Додека пратениците пристигнуваа за закажаната седница за Предлог-законот за ратификација на Договорот со Грција за името, истовремено од 11 часот пред Собранието се собираа граѓани на протест.
Пред законодавниот дом можеа да се чујат свирежи и извици од типот „Лажливци“, „Фашисти“, „Нелегитимен парламент“, „Заев предавник“, „Не во наше име“…
Насобраните граѓани бараат оставки од пратениците. На улицата, пред собраниската ограда се пее химната. Се слушаат и извици со поддршка кон претседателот Ѓорге Иванов, кој рече дека нема да го потпишува договорот.
„Овој договор не смее да помине, полн е со контрадикции. Договор направен каде се крши Устав, правно и уставно и меѓународно нема да помине. Затоа не се плашиме. Ова не е ден за плачење. Ова не е ден кога се крева македонска шарена, туку духовна револуција“, рече пред присутните професорот Нестор Огинар.
Тој нагласи дека „Македонија е нашето име, нашиот идентитет, нашата должност и достоинство“.
„Ако мислат дека со еден договор неважечки ќе не избришат – се лажат. Сме биле и пред оваа влада и пред многу други влади, сме биле и пред Европа и Америка, и ќе бидеме и кога нив ќе ги нема. Овој договор може да помине само со нелегална влада и нелегален премиер“, смета Огинар.
Исто така, присутните го повикуваа опозиционерот Христијан Мицкоски да ги напушти собраниските клупи со другите пратеници од ВМРО-ДПМНЕ.
Тоа и се случи, откако мнозинството пратеници во Собранието со 69 гласови „за“ го изгласаа Предлог-законот да се гласа по скратена постапка. Четириесет пратеници беа „против“.
Следно, според најавите е седница на Комисијата за европски прашања. Комисијата ќе има два дена, односно до среда на полноќ да го разгледува договорот. По Комисијата, Предлог-законот за ратификација на Договорот повторно би се нашол на пленарна седница, за да биде финално ратификуван.
Инаку, по Собранието демонстрантите продолжија да маршираат по скопските улици.
Демонстрантите запалија копија од Договорот со Грција
(Е.П. – Б.Ш.)