На платото пред Младинскиот културен центар утре (10 септември) ќе се одржи традиционалната поетска манифестација „Празник на липите“ организирана од Друштвото на писатели на Македонија, во услови на пандемија.
На свеченоста ќе му биде врачена наградата „Книжевен жезол 2020“ на македонскиот поет Михаил Ренџов, а за неговиот поетски опус ќе говори Владимир Мартиновски.
Ќе биде прочитано и писмото од странскиот добитник на жезолот, словачкиот поет Мирослав Биелик, кој поради пандемијата не беше во можност да допатува во Скопје. Со стихови од своите најнови стихозбирки ќе се претстават поетите Христо Петрески, Пајо Авировиќ и Сузана В. Спасовска, а потоа ќе настапат поетите кои учествуваа на конкурсот за најдобра песна на манифестацијата оваа година.
Присутните ќе имаат можност да добијат примерок од збирката поезија од двајцата лауреати специјално подготвена за оваа пригода.
Манифестацијата се реализира со поддршка од Министерството за култура и под покровителство на Град Скопје.