Пет азиски земји ги загрозуваат глобалните климатски амбиции инвестирајќи во 80% од планираните нови постројки за јаглен во светот, пишува „Гардијан“.
Финансискиот истражувачки центар „Carbon Tracker“, откри дека Кина, Индија, Индонезија, Јапонија и Виетнам планираат да изградат над 600 термоцентрали на јаглен, иако обновливата енергија е поевтина од повеќето нови централи за јаглен.
Инвестициите во еден од најопасните еколошки извори на енергија може да генерираат вкупно 300 гигавати енергија – доволно за напојување на Велика Британија повеќе од трипати, и покрај апелите на климатските експерти во ООН за откажување на сите нови централи за јаглен.
„Овие последни бастиони на јагленот пливаат наспроти плимата, кога обновливите извори нудат поевтино решение што ги поддржува глобалните климатски цели. Инвеститорите треба да се повлечат од новите проекти за јаглен, од кои многумина веројатно ќе создадат негативни приноси од самиот почеток “, вели Катарина Хиленбранд фон дер Нејен, авторка на извештајот.
Додека Азија продолжува да инвестира во погони за јаглен, земјите низ развиениот свет ги забрзуваат плановите за нивно укинување.
Кина е водечки светски инвеститор во јаглен, со планови да се зголеми постоечкиот погон, според извештајот.
„Carbon Tracker“ тврди дека соларните и ветерните паркови веќе можат да произведат поевтина електрична енергија од над 85% од постојните постројки за јаглен во земјата и дека до 2024 година обновливата енергија ќе може да ја надмине целата моќност на јагленот.
Во Индија, вториот по големина генератор на јаглен во светот, и во Индонезија, обновливата енергија ќе може да го надмине јагленот до 2024 година.Во Јапонија и Виетнам, пак, јагленот ќе биде неекономичен во споредба со обновливите извори до 2022 година.
