Талибанците ги затворија женските средни училишта во Авганистан само неколку часа откако започна новата учебна година во која беше најавено дека девојките ќе можат да се вратат во училиштата за првпат по промената на власта минатата година.
Неочекуваната одлука дошла вчера, и покрај тоа што авганистанското министерство за образование претходниот ден ги повика сите ученици да тргнат на училиште.
„Ги гледав моите ученици како плачат и како одбиваат да излезат од часот. Тоа беше многу болно“, изјави наставничка во женско училиште во Кабул, пренесува Франс 24.
Bizarre development on schools re-opening in Afg
We’re at a girls high school in Kabul, students were so happy to be back – but – then the headteacher received a msg from local Taliban saying older girls *can’t* go back, despite what was previous announced
Many now in tears pic.twitter.com/vKdB6cu3df
— Secunder Kermani (@SecKermani) March 23, 2022
Последната блокада за едукација на девојките во земјата се очекува да наиде на широка осуда од меѓународната заедница која ги повикуваше новите власти во Авганистан да ги отворат училиштата за жените и да им ги овозможат нивните права во јавниот живот.
Претставничката на Обединетите Нации во Авганистан, Дебора Лајонс, одлуката за затворање на училиштата ја нарече „вознемирувачка“.
По враќањето на Талибанците на власт во Авганистан, во средината на август минатата година, училиштата беа затворени поради пандемијата со КОВИД-19. Но, кога училиштата се отворија два месеци подоцна само момчињата и помладите девојки имаа дозвола да продолжат со настава.
Меѓународната заедница стравуваше дека Талибанците можат да го забранат целосното формално образование за жените, како што тоа го направија во периодот од 1996 до 2001 кога последен пат беа на власт. Правото на образование за сите е една од клучните точки во преговорите со авганистанските власти за обезбедување хуманитарна помош и признавање на новата власт, а повеќе земји и организации понудија да ги плаќаат наставниците.
Талибанците инсистираат дека нивната цел е да обезбедат училиштата за девојките на возраст од 12 до 19 години да бидат сегрегирани и да работат во согласност со исламските принципи.
Новата авганистанска власт воведе бројни ограничувања за жените. Од забрана за вршење на најголемиот дел од владините функции, преку правила на облекување и забрана за патување надвор од нивните градови без придружба. Истовремено во земјата беа приведени повеќе активистки за женски права.
