Европратениците денеска гласаа за вклучување на природниот гас и нуклеарната енергија на листата на одржливи активности на блокот, поддржувајќи го предлогот на Европската комисија што наиде на жестоки критики од групите за заштита на животната средина и може да предизвика правни предизвици.
Додека ЕУ се обидува да ги постави најдобрите глобални стандарди во борба против климатските промени, одлуката би можела да го наруши имиџот на блокот и да ја доведе во прашање посветеноста на регионот за постигнување климатска неутралност до 2050 година.
Претходно оваа година, Европската комисија го даде овој предлог за означување на гасот и нуклеарната енергија како зелена енергија, како дел од своите планови за изградба на иднина прифатлива за климата, што предизвика бес кај еколозите.
Европратениците од Комитетот за животна средина и економија се спротивставија на планот минатиот месец и закажаа одлучувачко гласање денеска во Стразбур.
Меѓутоа, европратениците ја отфрлија нивната резолуција со 328 гласови за и 278 гласови против, а 33 европратеници беа воздржани. За вето на предлогот беше потребно апсолутно мнозинство од 353 гласа.
Меѓународната еколошка организација „Гринпис“ веднаш соопшти дека ќе поднесе формално барање за внатрешна ревизија до Европската комисија, а потоа дека ќе преземе правна постапка пред Европскиот суд на правдата доколку резултатот не е конечен.
