Дистрибуцијата на новите материјали за учење кои ги подготви Министерството за образование и наука (МОН) во соработка со Бирото за развој на образованието, наменети за учениците од прво, второ, четврто и петто одделение за предметите за кои се изготвени нови наставни програми е во тек и ќе се заокружи пред почетокот на учебната година, соопштува МОН.
„Учениците нема да добијат скрипти, туку материјали кои се квалитетни, креативни и го разработуваат наставниот материјал за првото тримесечје. Во меѓувреме, во тек се постапките за одобрување на нови учебници за овие одделенија и наставни предмети. Сите се во различна завршна фаза и етапно ќе бидат заокружувани“, велат од МОН.
Паралелно, посочуваат од МОН, до училиштата се врши и достава на учебниците по сите останати одделенија – трето, шесто, седмо, осмо и деветто.
„Со оглед на тоа што процесот е интензивиран и ќе заврши до крајот на утрешниот ден, Министерството за образование и наука упатува апел до раководствата на основните училишта да ги подигнуваат материјалите за учење и учебниците од просториите на општините и да организираат нивна распределба и доделување на учениците на првиот училишен ден“, стои во соопштението.
Фото: МОН
