Со почеток во 12 часот, во вторник (8 ноември) во Културно-информативниот центар (КИЦ) ќе се одржи трибината под наслов „Какво време донесе ветерот во македонската книжевна стварност?“, по повод 10 години од објавувањето на антологијата „Ветерот носи убаво време“.
„Што се случи на македонската книжевна сцена во изминатата деценија? Дали настапи нова стилска формација или изразен книжевен индивидуализам? Какви поетики се доминантни во македонскиот книжевен простор и дали со нив се остварија нови вредности во естетската вертикала на нашата книжевност? Колку од авторите што пред десет години беа млади и надежни, дел од нив и дебитанти, денес се доминантни пера во македонскиот книжевен простор и дали за нив и натаму важи одредницата „млад автор“? Дали се случи некаква промена во рецепцијата на читателите за современата македонска книжевност? Кои и какви се актуелните нови гласови во македонскиот книжевен простор? Каква беше улогата на антологијата „Ветерот носи убаво време“ за македонската книжевна стварност? Ова се дел од прашања кои ќе бидат отворени на трибината ‘Какво време донесе ветерот во македонската книжевна стварност?’, која ја организира Културно-информативниот центар – Скопје, по повод 10 години од објавувањето на ‘Ветерот носи убаво време’ – антологија на најмладата македонска поезија и проза (Скопје: Матица македонска, 2012)“, пишува во најавата за настанот.
Уводни излагања на трибината ќе имаат приредувачите на антологијата „Ветерот носи убаво време“, Весна Мојсова-Чепишевска и Иван Антоновски, а со свои согледувања од перспектива на веќе етаблирани автори, издавачи и организатори на книжевни манифестации ќе се вклучат Јулијана Величковска и Жарко Кујунџиски, по што ќе се поведе и дискусија, се најавува во настанотн.
„Во рамките на настанот, преку куси разговори ќе бидат презентирани и согледувањата на авторите Ѓоко Здравески и Давор Стојановски, инаку и двајцата застапени во антологијата „Ветерот носи убаво време“ објавена пред една деценија, а денес едни од најприсутните автори на македонската книжевна сцена, иако и двајцата се со ангажман надвор од земјата. По изнесувањето на заклучните согледби од трибината ќе се одржи и поетско читање на дел од актуелните млади поетски гласови кај нас, оние кои всушност, денес се носители на новото време во македонскиот книжевен простор – Андреј Ал-Асади, Ивана Јовановска, Викторија Ангеловска, Андреј Медиќ – Лазаревски, Марија Велинова и Диме Данов“, посочуваат организаторите на настанот.
