Овојпат во рубриката #РаскажиМи го читаме краткиот расказ, престорен во „Кратка брачна драма во три чина“ од Тања Кузмановска.
Лица: Сопругот, Сопругата.
Сопругот, вработен од 9 до 5. Со реални очекувања од сопругата во врска со секојдневните домашни обврски.
Сопругата, со завршен факултет, но ѕвездите не и’ биле доволно наклонети да најде постојана работа. Има повремени преведувачки ангажмани и рачно изработува природна козметика.
I чин
Сопругот се враќа од работа и од пред продавница се јавува на телефон:
Сопругот – Да земам ли нешто за јадење?
Сопругата: – Не, ќе зготвам нешто набрзина.
II чин
Сопругот се враќа дома.
– Ги стави ли садовите за перење?
Сопругата: – Не.
Сопругот: – Ги посла ли испраните алишта?
Сопругата: – Не. Ама ја испратив до училиште Ана, оти во автобусот немало место и го прошетав кучето. Поминав 8.000 чекора.
Сопругот: – А направи ли ручек?
Сопругата: – Не, ама правев рекламна кампања.
Сопругот: – Ако сакаш да мислиш, ќе станеш сабајле во 2 часот и тогаш ќе мислиш.
Сопругата: – Јас навечер мислам, сабајле спијам.
Сопругот: – Кога ќе станеш наутро треба да си повторуваш: Жена сум, жена сум…
Сопругата: – Кога ќе станувам наутро ќе си повторувам: седам дома, перам, готвам, чистам, на ништо друго не мислам!
Сопругот: – Ајде сега нарачај пица!
Сопругот и сопругата: Се смеат гласно двајцата.
III чин
Утредента
Сопругот: – Исчисти ли?
Сопругата: – Не, ама го завршив каталогот за производите.
***
Тања Кузманоска е родена во 1975 година во Штип. Завршила Филолошки факултет на универзитетот св. Кирил и Методиј, во Скопје, на групата Македонски јазик и јужнословенски јазици со англиски јазик. Работи како преведувачка. Во 2020 година за својот поетски ракопис ја добива наградата „Лесновски ѕвона“ за најдобар дебитантски поетски ракопис.
Освен поезија пишува проза и блог за патописи на кој ги објавува авторските фотографии. Нејзините песни и патописи се објавувани во неколку зборници и електронски и пишани списанија за литература, уметност и култура.
Радио МОФ почна со рубриката #РаскажиМи, каде секој петок објавуваме по еден расказ на македонски јазик. Со рубриката целиме да промовираме домашни и странски автори кои пишуваат, односно се преведени на нашиот мајчин јазик. Истовремено, сакаме да придонесеме во популаризацијата на прозата на македонски јазик.
Сите заинтересирани за објавување на свој расказ во рубриката #РаскажиМи своите дела може да ни ги испратат на info@radiomof.mk, заедно со куса биографија. Расказите и преводите треба да бидат на македонски јазик.
