Во Културно-социјалниот простор Центар-Јадро утре (вторник) од 19 часот ќе се одржи првата Отворена средба за вклучување на уметничката и локалната заедница, во склоп на проектот „Arts Hub“.
Идејата на овие отворени средби, од Центар-Јадро велат дека е поттикнување дискусија и размена на идеи со заедницата со цел идентификување на локалните проблеми и потреби.
„На отворената средба е поканет секој кој сака да се вклучи во продуктивен дијалог кој ќе води кон нови и свежи решенија/идеи за уметнички интервенции, за можни акции и ќе иницира нови соработки и партнерства помеѓу уметниците од независната сцена и граѓаните. Преку оваа активност се надеваме дека ќе обезбедиме учество на заедницата и пошироката публика во сите фази на проектот Arts Hub кој што го развиваме со поддршка на Фондација Отворено општество – Македонија, 2023/24 година“, велат од Центар-Јадро.
Со организирање на овие отворени средби, оттаму велат дека проектот се стреми кон напуштање на класичните формати на продукција и презентација на уметнички проекти и се фокусира на активна работа со креативци од повеќе уметнички дисциплини, партиципативност, како и активно вклучување на граѓаните и публиката.
„Проектот Arts Hub е место за спојување, креативно истражување и изразување, каде што уметниците и сите оние што се заинтересирани ќе можат да ги развијат и надградат своите интереси, знаења и вештини. Главна цел на проектот е да се мотивираат уметниците кои што работат во различни уметнички дисциплини да ги зголемат своите знаења и вештини во областа на социјално ангажираната уметност, специфичните форми на театар, аудио продукцијата и аудио подкаст, фотографија и видео и како и тоа да се поттикнат, користејќи го стекнатото искуство низ едукативниот процес да создадат свои партиципативни проекти преку кои ќе имаат импакт во заедницата и ќе делуваат во подигање на свеста за разни социјални и политички теми и проблеми“, додаваат од Центар-Јадро.
