Здружението за промоција на документаристика „МакеДокс“ соопштува дека е продолжен повикот за петтата генерација на „Докуникулци“ на возраст од 14 до 18 години кои сакаат да бидат дел од годинешната работилница за креативен документарен филм.
Оттаму велат дека се во потрага по млади луѓе, храбри да се изразат креативно и слободно и спремни да се впуштат во незаборавна авантура. Дванаесетмината величествени ќе бидат поделени во 3-4 помали групи со по еден ментор, а на крајот на работилницата, секоја група ќе треба да има готов креативен документарен филм.
Рокот за пријавување е продолжен до 15 јуни.
Во продолжение го споделуваме повикот за „Докуникулци“ на „МакеДокс“:
Како да се пријавиш?
Сними се себе си, со телефон, веб-камера или на било кој друг начин, и преку видеото, кое не треба да е подолго од 5 минути, одговори на следниве прашања:
- Освен преку соништата, накој друг начин бегаш од секојдневието?
- Кога би можел да бидеш кое било животно или растение, што би избрал/а да бидеш и зошто?
- Кое е твоето најрано сеќавање?
- Кога би сретнал/а магаре што знае да зборува, што прво би ти кажало и зошто?
- Кој документарен филм ти оставил најголем впечаток и зошто?
- Која е приказната што сакаш да ја раскажеш и зошто е различна од останатите?
- Што би издвоил/а за себе како важно, специфично, откачено?
Видеото испрати ни го на dokunikulci@makedox.mk преку WeTransfer. Уште подобро, доколку си во можност, прикачи го на VIMEO или YouTube, заштитено со лозинка, а нам испрати ни ги линкот и лозинката.
Повикот е отворен до 15 јуни 2023, a резултатите ќе бидат објавени до 20 јуни 2023 година.
Работилницата ќе биде распоредена во четири сесии и ќе се случува во следниот период:
– јули 2023 (5 дена во природа)
– август 2023 (8 дена на филмскиот фестивал „МакеДокс“)
– 2 есенско-зимски сесии по договор (5-7 дена)
На работилницата, своите знаења и вештини во документаристиката ќе ги споделат членови на креативниот тим на „МакеДокс“, ланските докуникулци и наши пријатели од други земји – докажани докупрофесионалци.
Учеството е бесплатно. Трошоците за сместување, превоз и храна се покриени, но имај на ум дека сместувањето – особено за првата сесија во природа не е во хотел со пет ѕведзички, туку понекогаш дури и под отворено небо, со милион ѕвезди, заедно со тимот на „МакеДокс“.
Бараме млади луѓе, храбри да се изразат креативно и слободно и спремни да се впуштат во незаборавна авантура. Дванаесетмината величествени ќе бидат поделени во 3-4 помали групи со по еден ментор, а на крајот на работилницата, секоја група ќе треба да има готов креативен документарен филм. (Во овој момент, не бери гајле за опрема.)
ВАЖНО: Доколку си малолетен/на, заедно со пријавите, треба да доставиш и согласност од одговорен возрасен со која се одобрува твоето учество на работилницата. Доколку остана некое прашање неодговорено, пиши ни.
