[Став] Државна матура – никој, ама никој не сака да учествува во оваа шарада

– Се препишува и тоа го овозможува целиот систем, од министерство се до оперативни единици (наставници, класни раководители, хигиеничари итн.)

– Голем број на ученици, ќе се стекнат со статус завршено средно образование, а да речеме во групата кадешто јас „вардев“, на испитот по мајчин јазик (оној за кој „ратуваме“ со оние кои не го признаваат) не знаеше како се пишува буквата „х“ ракописно

– Никој ама никој не сака да учествува во оваа шарада, од министри, се до хигиеничари и назад, да не зборуваме за учениците, кои дури ни во сопствените животи не сакаат да учествуваат, ама јбг, модерно било тоа

Затоа предлагам:

– Наместо задолжително средно образование, тоа да си се врати да стане незадолжително, навистина има „деца“ со по 18 и 19 години кои не треба да се во траекторијата на образовните скалила после основното образование, нека се спукаат некои работнички универзитети и по еден занает, ќе вадат повеќе пари отколку другите – ИМ ГАРАНТИРАМ.

– Наместо државна матура со екстерно тестирање, системот, оттука и наставниците и цел персонал, да ги охрабруваат учениците да се полагаат училишна матура, ем полесна, ем помалку брукање, ем помала логистика

– Државна матура да можат да положат само оние кои во текот на 4 години средно образование и на училишната матура покажале висок успех и се мотивирани за образование, наука и развој. Овој вид на матура не смее да се одржува во просториите на училиштето во коешто учат учениците, со цел да се избегнат импликациите – препишување и провалување на тестовите, да не зборувам за класни раководители кои влегуваат во училниците и им наложуваат на тестаторите да премижат вишок телефони.

– Да се воведе приемен испит на факултетите во државава, не само во однос на познавање на општи работи поврани со струката, туку и интервју, каде професорот ќе разговара со потенцијалниот студент и ќе направи профил и проценка. Јас доколку би интервјуирал некого, на пример, доколку некој сељо, нема да го примам на факултет дури и да има 5.00 просек во средно

– Да се реформира целокупното образование од основно до средно, да се стави акцент на образовниот карактер, исто колку и на социјалниот карактер на училиштата, особено средното, да се вработуваат повеќе психолози, социјални работници, да се подигнат критериумите на настава и оценување, да им се забрани на родителите да замараат за оценки, и да се мотивираат учениците да вклучат мозок во каква била животна операција

Во мое време, ако некој те фатеше да препишуваш, ќе се засрамеше и ќе поцрвенеше, не од шо те фатиле на препис, туку од шо немаш научено, од шо си тиквар. Сега, не можеш телефонот да им го земеш од рака на државна матура.