Дебитантската книга раскази „Вечерен автобус“ од македонскиот автор Стефан Алијевиќ на 29 јуни ќе биде промовирана во Нови Сад.
Настанот што e во организација на „Културанова“ ќе започне во 19 часот, а ќе се одржи во „Ај здраво“.
Рецензентот вели дека „Вечерен автобус“ го сецира нашето време и општество со севкупниот амбиент на нагласување на деградацијата.
„Авторот размислува за различни прашања. Како беше во 90-тите? Дали нешто се промени? Како посттранзицискиот период влијаеше на сите нас? Значи, многу од ликовите во оваа книга доаѓаат од маргините, како што се отпадниците, квир луѓето, инвалидите, невротичните пушачи и оние кои се секогаш жедни за сочни озборувања, меѓу другите“, се вели во рецензијата.
Понатаму, потенцирано е дека расказите суптилно обработуваат теми како што се разликите меѓу луѓето, класите, нееднаквоста, личниот срам поради идентитетот и др.
„Расказите се позиционирани помеѓу автофиктивниот свет, произлезен од детските спомени на писателот и морничавата проекција на периодот на пандемијата. Постои дихотомија помеѓу личната меморија и фикцијата, создавајќи интриги кај читателот да продолжи да погодува што од пишаниот материјал е личната вистина на авторот, а што е чиста фикција“, стои во рецензијата.
Инаку, на настанот ќе има и говори од авторот Стефан Алијевиќ, од рецензентот Далимор Томасовиќ, додека модератор ќе биде Ален Брлек, уредник на едицијата „Зад барикадите“.
Книгата влезе во вториот круг за наградата „Шефица Цвек“, изборот на регионалнa феминистичка и квир книжевност. Објавувањето на книгата е дел од проектот „Night bus goes Serbia“. Публикација е објавена со финансиска поддршка на Европската Унија.
