Јасмин Мулахушиќ уште еднаш ги етикетираше и таргетираше новинарите Слаѓан Томиќ и Данијал Хаџовиќ во својата најнова објава на Фејсбук, реагира регионалната мрежа SafeJournalists.
Од таму велат дека Мулахушиќ, државјанин на Луксембург по потекло од Босна и Херцеговина, изрази уверување дека „прашање на време е кога некој ќе ги сретне Слаѓан и Данијал и ќе има убав разговор со нив“. Исто така, посочуваат од мрежата, тој изнесе низа невистини и поттикнувачки манипулации за поврзаноста на семејството на новинарот Томиќ со Армијата на Република Српска и за најтешките злосторства извршени за време на опсадата на Сараево.
„Јасмин Мулахушиќ со години вербално ги малтретира, им се заканува и ги изложува на безбедносен ризик Слаѓан Томиќ и другите новинари во БиХ, а ниту Обвинителството на БиХ, полицијата и судските власти воопшто не најдоа соодветен правен и институционален одговор за санкција кон Мулахушиќ и неговите ‘ФБ воини’, ниту пак презедоа соодветни мерки за заштита на правата и безбедноста на новинарите“, велат од мрежата.
Здружението на новинари на БХ (БХЈА) соопшти дека е неприфатливо и индикативно што истрагата против Јасмин Мулахушиќ се води повеќе од три години без резултати, иако новинарите на БиХ, многу медиуми и новинари доставија десетици извештаи со докази за закани, поттикнување на насилство, навреди на национална и верска основа, говор на омраза и други кривични дела опасни по животот и професионалната безбедност на медиумските работници.
„Нагласуваме дека Обвинителството на Босна и Херцеговина претходно го поврзуваше Мулахушиќ со терористички активности. Мулахушиќ, како некој кој е поврзан со терористички активности според надлежните институции, има голем број следбеници на социјалните мрежи, што го прави ширењето на неговиот говор на омраза и содржината на омраза уште поголем проблем“, забележуваат од SafeJournalists.
Мрежата SafeJournalists, која застапува повеќе од 8.200 медиумски професионалци во Западен Балкан, се придружува на својата членка БХЈА и јавно бара од Обвинителството на БиХ итно да се посвети на решавање на „случајот Мулахушиќ“ и да ја информира јавноста за својата работа.
„Ги повикуваме и надлежните органи да преземат соодветни мерки за заштита на колегите Слаѓан Томиќ и Данијал Хаџовиќ за да се спречат нови закани по нивната безбедност. Мрежата SafeJournalists ќе ги информира релевантните национални и меѓународни засегнати страни за овој случај. Секој напад врз новинари е напад врз јавниот интерес, демократијата и правата на сите граѓани“, стои во реакцијата на мрежата која поврзува новинарски организации од Македонија, БиХ, Хрватска, Србија, Косово и Црна Гора.
