По повод 15-годишниот јубилеј на Институтот за родови студии при Филозофскиот факултет на УКИМ креираше Платформа за родовите студии која се базира на вештачка интелигенција (ВИ) со цел да се овозможи пристап на студентите, професорите но и на пошироката јавност до информации и знаења во областа на родовите студии.
Преку Платформата корисниците можат да разговараат со чет-ботот за родовите студии на Факултетот, како и за родовите теми, информации и прашања.
„Здраво! Јас сум ИРС, AI асистент на Институтот за родови студии. Како асистент, можам да одговарам на прашања и да обезбедувам информации за родовите студии, феминизмот, човековите права и слични теми. Исто така, можам да ги пренесувам информациите и упатствата од Институтот за родови студии и да ви помогнам во пронаоѓањето на релевантни линкови и ресурси. Како помошник, сум овде за да ви помогнам и да одговорам на вашите прашања, па не се срамете да прашувате! Што можам да ви помогнам денес?“, стои во автоматизираната воведна порака на чет-ботот.
Директно одговорни за овој проект се проф. д-р Боби Бадаревски и м-р. Стефан Васев со голема поддршка на проф. д-р Сузана Симоновска и проф. д-р Денко Скаловски.
Од Институтот велат дека креирањето на ВИ Платформата за родовите студии им овозможува на истражувачите да пристапат до големи количини на податоци и да ги анализираат на брз и ефикасен начин.
„Оваа платформа ќе им овозможи на истражувачите да изведуваат комплексни анализи и статистички модели, што ќе ги подобри нивните истражувачки напори и резултати. Истражувачите ќе можат да ја искористат AI за идентификување на трендови, препознавање на нееднаквости и предвидување на социјални и културни промени поврзани со родовите“, посочуваат од Институтот.
Оттаму потенцираат дека креирањето на оваа платформа е логичен и неизбежен чекор во развојот на Институтот за родови студии, која ќе ги овозможи истражувачите студентите и активистите да ги искористат предностите на ВИ технологиите за подобрување на својата работа и за придонес во изградба на праведно општество.
„Студентите ќе имаат пристап до различни образовни ресурси, вклучувајќи ги наставни материјали, вежби, семинари и студиски материјали. Исто така, платформата ќе им овозможи на студентите да ги прошират своите истражувачки и аналитички вештини преку користење на ВИ алатките и методологиите. ВИ Платформата за родовите студии ќе биде важен алатка за активистите и застапувачите во областа на родовите студии. Оваа платформа ќе им овозможи на активистите да ги анализираат историските и сегашни трендови, да ги препознаат нееднаквостите и да ги промовираат решенијата за нивното надминување. Исто така, платформата ќе им овозможи на активистите да ги споделуваат своите искуства и знаење со широката јавност“, велат од Институтот.
ВИ Платформата за родови студии е достапна за користење преку следниов ЛИНК.
