Гладот сè уште може да се „спречи“ во Газа доколку Израел дозволи хуманитарните агенции да донесат поголема помош, изјави шефот на Агенцијата на ОН за палестинските бегалци (УНРВА), Филип Лазарини, пренесува Н1.
Според ОН, 2.2 милиони луѓе, што претставува огромно мнозинство од населението, се во опасност од глад во Појасот Газа поради израелските напади.
Сериозниот недостиг може да доведе до повисоки стапки на смртност кај новороденчињата на северот од територијата, каде што секое шесто дете на возраст под две години е жртва на акутна неухранетост.
„Тоа е катастрофа предизвикана од човекот… Светот беше посветен никогаш повеќе да не дозволи глад“, рече Лазарини.
Според него, гладот сè уште може да се „избегне со вистинска политичка волја да се овозможи пристап и заштита на помошта“.
Палестинците во Газа во последните денови изјавија дека се принудени да јадат лисја и сточна храна.
Пред војната, околу 500 камиони дневно влегуваа во Појасот Газа со разновидна помош. Но, од 7 октомври, тој број ретко надминува 200, и покрај огромните потреби кои се уште поитни сега кога економијата и земјоделското производство се уништени од војната, според ОН.
