Првата жена на чело на агенцијата за телекомуникации на Обединетите нации (ОН) Дорин Богдан-Мартин е загрижена за можните екцеси на вештачката интелигенција, но она што најмногу ја загрижува е дигиталниот јаз.
Меѓународната телекомуникациска унија (ИТУ) која таа ја презеде пред речиси една и пол година, проценува дека на околу 2,6 милијарди луѓе им е ускратен пристапот до дигиталната технологија, пренесува Данас.
„Тие никогаш не се поврзале на интернет. Тоа е она што ме држи будна ноќе, бидејќи ако не сте дел од дигиталниот свет, тогаш не сте дел од светот на вештачката интелигенција“, рече таа, додавајќи дека тоа е еден од најголемите предизвици на сегашната генерација.
ОН имаат за цел да соберат 100 милијарди долари до 2026 година за да го намалат јазот меѓу оние кои имаат и немаат дигитален пристап.
Таа предупреди дека ќе бидат потребни четири пати повеќе средства за вистински да се намали јазот. Дополнително, се наведува дека јазот уште повеќе ќе се прошири со континуираниот напредок на генеративната вештачка интелигенција технологија.
Генералната секретарка ги истакна многуте позитивни начини на кои вештачката интелигенција може да го трансформира општеството, вклучително и зајакнување на борбата против климатските промени и сиромаштијата, што ќе ги подобри образованието и здравствената заштита.
Но, иако има „неверојатни можности“, таа предупреди на ризиците што треба да се ублажат.
Според неа, новите технологии како што е вештачката интелигенција може да се користат за да се поткопа довербата преку дезинформации, кои се сè пософистицирани и е потешко да се детектираат.
