„Маски во движење“ е динамична работилница на која преку експресивна арт терапија и комбинација на ликовна уметност, движење и драма, учесниците ќе се впуштат во изработка на сопствена маска од различни материјали. Работилницата ќе се одржи на 15 мај (среда) од 18 до 21 часот во КСП Центар Јадро а ќе ја води Ана Тодоровска, психолог.
Како што се вели во најавата, на ова три часовно искуство, преку учество во мала група, учесниците ќе:
– Создадат своја маска од различни материјали
– Ќе ја запознаат и истражат својата социјална маска преку индивидуални и групни вежби
– Ќе се вклучат во интерактивни сценарија и раскажување приказни
– Ќе учествуваат во групен процес на креативно самоистражување во сигурна и поддржувачка средина
„Маската како објект е присутна низ различни култури илјадници години и со различни намени – таа може да сокрива или да открива. Во античкиот римски театар, терминот ‘персона’ се однесува на маска што ја носат актерите за да прикажуваат различни ликови во театарските претстави. Оттаму, во својата теорија позната како аналитичка психологија, швајцарскиот психијатар Карл Густав Јунг, под ‘персона’ подразбира социјална маска, начинот на кој се претставуваме пред светот со цел да оставиме одреден впечаток“, пишува во соопштението за настанот. .
Работилницата ќе се одвива во четири фази: ориентација, креација, активација, интеграција. Препорачуваме да дојдете во удобна облека која нема да го попречува вашето движење и за која нема да се грижите да ја извалкате.
„Претходно искуство и талент за цртање / изведување не се потребни, бидејќи се фокусираме на процесот на создавање, наместо на естетиката на делото. Доволно е само да сте љубопитни и отворени за истражување нови аспекти од себе. Материјалите се обезбедени од организаторот, но секој учесник е добредојден да ја збогати колекцијата со материјали кои веќе не му се потребни (монистри, скршен стар накит и сл.)“, стои во најавта.
