Змија вчера попладнето влегла во мензата во студентскиот дом „Стив Наумов“ во населбата Автокоманда во Скопје. На фотографиите ги објави редакцијата на агенцијата Мета.мк, а ги испратиле студенти сместени во домот, се гледа змијата како е притисната на влезната врата од објектот.
Директорот на Државниот студентски дом Скопје (ДСД Скопје), Виктор Велевски за Мета.мк потврди дека змијата влегла во студентската менза и дека се запознаени со настанот.
Фото: Студенти за Мета.мк
Вчера утрово пак, на Инстаграм страницата „Студентарија“ беа објавени фотографии на кои се гледа неискосена трева кај бараките што се дел од „Стив Наумов“.
фото: „Студентарија“ (@studentarijamk) на Инстаграм
Велевски за Мета.мк рече дека вработените во институцијата уште вчера ја коселе тревата, а поради зголемениот обем на работа, помош побарале и од Јавното комунално претпријатие „Гази Баба“.
„Искосивме, побаравме помош од ЈКП „Гази Баба“, работиме секој ден. Врне, грее сонце и тревата си расте. Капацитетите на домот се тие“, рече директорот на ДСД Скопје.
Тој додава дека е потребно да се одржува теренот и околу студентскиот дом „Стив Наумов“, затоа што е загрозена безбедноста на сите граѓани на општината, а не само на студентите кои се сместени во домот.
Ова не е првпат змија да се појави во овој студентски дом. Поради близината на парк-шумата Гази Баба, во изминативе години во неколку наврати се забележани влекачи во или околу објектите на домот.
