Министерот за животна средина и просторно планирање Изет Меџити, заедно со вицепремиерот Арбен Фетаи, како и пратеници од регионот и општински советници вчера најавија затворање на нестандардната депонија на Липково, која се наоѓа во близина на селото Никуштак.
Тој истакна дека во рамките на ИПА2 Програмата за животна средина и климатска акција предвидени се значајни проекти за управување со отпадот во Источниот и Североисточниот регион.
„Овие проекти вклучуваат набавка на возила и контејнери, затворање на нестандардни депонии во двата региона како и изградба на регионален систем за управување со отпад. Проектот опфаќа набавка на возила и контејнери на соодветните региони, вклучително и општина Липково, која ќе добие камион за собирање смет и 139 контејнери. Дополнително, планирано е затворање на повеќе нестандардни депонии, вклучително и депонијата во Липково (Никуштак) и пет други помали депонии во Матејче, Горна Рупа, Лојане 1, Лојане и Гору. Во моментов проектот е во фаза на тендерирање по претходното откажување на избран изведувач. Новата проценка започна на 6 јуни 2024 година и се очекува да биде завршена до крајот на август 2024 година, кога ќе биде потпишан Договорот и ќе започне теренската работа“, пишува во соопштението на Министерството за животна средина и просторно планирање.
Во меѓувреме, мал дел од депонијата, како што истакнаа, ќе остане отворен до изградбата на регионалната депонија во Свети Николе. Во втората фаза од проектот пак, во рамките на ИПА 3 Програмата, депонијата е најавено дека ќе биде целосно затворена.
„По изградбата на регионалната депонија, отпадот од Липково ќе се транспортира до друг пункт во Куманово, а потоа до регионалната депонија во Свети Никола“, додаваат од МЖСПП.
Во нестандардната депонија во Липково, која се наоѓа во близина на селото Никуштак, ќе се вршат активности како преобликување на телото на депонијата, тампонирање стар отпад, изградба на пасивен систем за собирање гас и покривање на депонијата со здрава почва, посочија од МЖСПП и додадоа дека депонијата се наоѓа на стрмна падина и е далеку од секакво водно тело.
