Вкупно 12 пожари се активни низ Македонија, соопшти утрово Центарот за управување со кризи (ЦУК). Во текот на вчерашниот ден, имало вкупно 49 пожари, од кои 7 се под контрола, а 30 се изгаснати.
Активни пожари има кај Јасен – Белица каде гори борова шума, потоа кај селата Пресека и Цера каде гори борова шума и папрат, на Галичица – на исток во правец на селата Лескоец и Стење, односно на запад кон месноста Војтино и на север кон планинарска куќа, каде гори шума и нискостеблеста вегетација.
Пожар има и кај селото Дебреште кое се шири кон селата Рилево и Зрзе, како и кон селото Карпа каде гори нискостеблеста деградирана шума и сува трева. Борова и букова шума гори и кај селата Патеец и Козичино, односно пожарот е проширен кон селото Горно Крушје.
Пожар има и кај селата Зајас и Горно Строгомиште каде гори мешана шума, но и кај селото Врбен каде гори смрека и сува трева. Од ЦУК посочија дека пожар на ниска вегетација и деградирана шума има кај селата Полог, Брник, Ивени, Рапеш и Паралово, а гори и кај селото Острец, односно сува трева и густа мешана шума.
Нискостеблеста вегетација гори кај селата Пласница и Латово, додека пожар на мешана шума има кај селото Грешница. Пожар има и кај селото Ратковица кон Пониква каде гори мешана шума.
