Платформата Телеграм соопшти дека ќе ги споделува ИП-адресите и телефонските броеви на корисниците на властите доколку имаат валидни правни барања, што означува голем пресврт на политиката за компанијата, јавува Евроњуз.
Одлуката на компанијата, која со години одбиваше да ја контролира платформата, доаѓа откако нејзиниот извршен директор и ко-основач Павел Дуров беше уапсен во Франција во август поради неуспех да управува со екстремистичка содржина на Телеграм.
Тој беше ослободен со кауција, но мора да остане во Франција за време на тековната истрага за компанијата.
„Јасно ставивме до знаење дека ИП-адресите и телефонските броеви на оние кои ги прекршуваат нашите правила може да им бидат откриени на релевантните органи како одговор на валидни правни барања“, рече Дуров во објавата на Телеграм во понеделникот до своите 13 милиони претплатници.
Телеграм сега експлицитно има посочено на веб-страницата „Ако Телеграм добие валидна наредба од релевантните судски органи со која се потврдува дека сте осомничен во случај што вклучува криминални активности кои ги прекршуваат Условите за користење на Телеграм, ќе извршиме правна анализа на барањето и може да ја споделиме вашата ИП адреса и телефонски број на релевантните органи“.
Компанијата рече дека таквите обелоденувања на податоци ќе бидат вклучени во нејзините извештаи за транспарентност. Телеграм, исто така, забележа дека може да собира метаподатоци како што се ИП адресата, уредите и употребените апликации на Телеграм, како и историјата на промените на корисничкото име за да се справи со спам, злоупотреба и други прекршувања.
Телеграм се претставува како платформа која не модерира многу или не доставува кориснички податоци до државите, иако може, бидејќи шифрирањето од крај до крај не е стандардна поставка, што значи дека многу корисници не знаат дека нивните податоци се чуваат освен ако не изберат шифрирање за секоја порака.
