Голема меѓународна студија за однесувањето на децата на училишна возраст покажа дека во просек 11% од испитаниците ги користеле социјалните мрежи на проблематичен начин во 2022 година, а 7% во 2018 година, пренесува Ал Џазира Балканс.
Истражувањето сугерира дека од пандемијата има нагло зголемување на она што го нарекува „проблематично“ користење на социјалните медиуми кај младите. Истражувачите од европскиот огранок на Светската здравствена организација (СЗО) дошле до овој заклучок откако анкетирале речиси 280.000 деца на возраст од 11, 13 и 15 години во 44 земји.
Авторите на извештајот наведуваат дека резултатите „покренуваат загриженост за влијанието на дигиталната технологија врз менталното здравје и благосостојбата на младите во Европа“.
„Проблемната употреба е најчеста кај 13-годишниците, максимум во раната адолесценција и е поверојатно да ја пријават девојчињата отколку момчињата. Откривме и дека нешто повеќе од една третина од адолесцентите изјавуваат дека се во постојан онлајн контакт со пријателите и другите. Тоа значи дека тие се поврзани речиси цел ден“, рече Џо Инчли од Универзитетот во Глазгов, меѓународна координаторка на студијата.
Сепак, извештајот не заклучува дека времето поминато на Интернет е секогаш штетно. Тинејџерите кои се чести корисници на социјалните мрежи известуваат за посилна поддршка од врсниците и социјални врски.
За „проблематичното“ малцинство, беше откриено дека употребата на социјалните мрежи е поврзана со симптоми слични на зависност, кои вклучуваат занемарување други активности во корист на трошење време на социјалните мрежи, вклучување во расправии и лажење за тоа колку време поминуваат на интернет, како и неможноста да се воспостави самоконтрола.
Студијата, исто така, ја нагласува загриженоста за процентот на тинејџери за кои се смета дека се изложени на ризик од „проблематично“ играње видео игри, што е почеста кај момчињата отколку кај девојчињата.
Ханс Клуге, регионален директор на СЗО за Европа, истакна дека резултатите јасно покажуваат дека социјалните медиуми можат да имаат и позитивни и негативни последици за младите луѓе.
Тој посочи дека е потребно повеќе образование за дигитална писменост за да им се помогне на младите да развијат здрав пристап до интернет.
„Јасно е дека ни треба итна и одржлива акција за да им помогнеме на адолесцентите да ја избегнат штетната употреба на социјалните медиуми, за која се покажа дека води до депресија, малтретирање, анксиозност и слаби академски перформанси“, рече Клуге.
