Отворањето на изложба на графики од Трајче Блажевски ќе се одржи вечерва, 18 октомври, со почеток во 19 и 30 часот во Центарот за култура „Антон Панов“ во Струмица. Авторот ќе се претстави со триесетина уметнички дела – графики изработени во периодот 2017-2024 година.
„Да се патува по 45-годишната творечка траекторија на д-р Трајче Блажевски претставува деликатна и многу сложена авантура. Неговата обемна био-библиографија на извесен начин, сама по себе, априори претставува доволна индикација дека станува збор за еден од најактивните и најзначајни македонски графичари кој повеќе се презентирал на интернационалната, отколку на домашната ликовна сцена“, пишува ликовната критичарка Конча Пиркоска во каталогот за претстојната изложба на Трајче Блажевски.
Уметникот Блажевски реализирал повеќе од 60 самостојни изложби во Македонија, Србија, Бугарија, Германија, Италија, Словенија, БиХ, Црна Гора, Полска и Романија. Учествувал во над 600 домашни и странски изложби. Добитник е 16 домашни и 5 странски награди во текот на неговата творечка кариера. Бил професор во Училиштето за применета уметност, технички уредник во дневниот весник „Нова Македонија“, поседувал статус на слободен уметник, предавал во Трговско-училишниот центар, работел во Културно-информативниот центар во Скопје и бил редовен професор на Факултетот за ликовни уметности при Универзитетот „Св. Кирил и Методиј“ во Скопје, од каде заминува во пензија.
Изложбата на графики на уметникот Трајче Блажевски се организира од Центар за култура „Антон Панов“ – Струмица, а е финансиски поддржана од Годишниот конкурс за поддршка на проекти од национален интерес за 2024 година на Министерството за култура и туризам.
