Национално студентско тело и Институтот за добро управување и евроатлански перспективи го лансираат проектот „Младите создаваат во својата земја“
Оваа иницијатива, велат од Националното студентско тело, има за цел да одговори на актуелните предизвици со одливот на млади таленти од земјата, нудејќи конкретни мерки за финансиска и институционална поддршка на младите дипломци во Македонија.
„Проектот е насочен кон стимулирање на претприемачкиот дух кај младите преку доделување ваучери до 10.000 евра, кои ќе можат да се користат за основање на стартапи, сопствени бизниси или продолжување на образованието. Оваа мерка има за цел да создаде можности за младите да ги реализираат своите професионални амбиции дома, наместо во странство, и со тоа да придонесат за економскиот и општествениот развој на земјата“, велат од студентската организација.
Во рамки на проектот, младите ќе имаат можност да аплицираат за ваучери кои ќе им овозможат: Основaње на сопствен бизнис со поддршка од Агенцијата за вработување на Република Северна Македонија; Креирање стартапи со поддршка од Фондот за иновации и технолошки развој; Продолжување на образованието на втор и трет циклус студии на домашните универзитети.
Поддршката од државните институции, вклучувајќи ги Министерството за економија, Министерството за образование и наука и Агенцијата за вработување, како што велат студентите, ќе биде клучна за успешната реализација на проектот.
„Нашата цел е да го намалиме одливот на млади од Македонија, нудејќи конкретни и одржливи решенија за развој на кариерите на младите тука во нивната земја. Проектот „Младите создаваат во својата земја“ не само што ќе поттикне економски раст, туку и ќе создаде нова генерација на млади професионалци кои ќе го водат патот кон поодржлива и просперитетна иднина за Македонија. Задржувањето на талентираните млади во земјата е клучно за долгорочниот развој на нашето општество“, нагласуваат од Националното студентско тело.
Повеќе за содржината, целите и условите за аплицирање може да се види на овој ЛИНК.
