Рецензија на влијателниот албум „Loveless“ од „My Bloody Valentine“, објавен за издавачката куќа „Creation Records“.
Објавен на 4-ти ноември 1991 година, „Loveless“ од „My Bloody Valentine“ и денес е мистерија и ремек-дело, кое не ја изгубило својата моќ и влијание дури и по повеќе од три децении. Ова не е само музички албум – тоа е звучен пејзаж што го обзема слушателот и го носи во свет каде звукот ги брише границите на реалноста.
Со „Loveless“, „My Bloody Valentine“ создаваат нешто сосема ново и досега невидено во рок музиката. Музичките слоеви кои ги гради фронтменот и продуцент Кевин Шилдс се апсолутно иновативни, користејќи извртени гитари, неочекувани звуци и кревки вокали кои се испреплетуваат како ехо од соништата. Техниката на „bending“ или „влечење“ на звукот, преку која Шилдс добива пулсирачки, флуидни ефекти, создава илузија на некакво лебдење, како илузорно искуство каде секој звук е истовремено апстрактен и конкретен.
Отворањето на албумот со „Only Shallow“ веднаш го поставува концепцискиот тон за она што следува – бучава која не е непријателска, туку нежна и обвивачка, како сонување со отворени очи. Вокалите на Биланда Бучер се речиси невидливи, но сепак моќни и присутни. Таа текстура на звук и етерична вокална изведба е клучот што го прави „Loveless“ уникатен и зашеметувачки.
„Loveless“ во својата суштина е апстрактна уметност во аудиоформат. Слушателот се внесува во состојба која е повеќе медитативна отколку вообичаено слушачка. Тоа е искуство кое повикува на целосно вложување во музиката, оставање на сѐ останато и потонување во слоевите на гитари и текстури. Овој албум е подлабок и позначаен од само звучен контекст, тој е специфично чувство и поетска приказна изразена преку цела симфонија од „шум“ и хармонија.
Преку своите кршливи а истовремено разорни звуци, „Loveless“ успеа да го трансформира алт-рокот, а влијанието на „My Bloody Valentine“ одекнува и денес во музиката на безброј бендови и жанрови, од shoegaze, neo-psychedelic до современата електронска музика. Но, ретко кој успева да ја долови таа уникатна магија што ја поседува „Loveless“ – истовремено топол и ладен, близок и далечен, интимен и универзален.
Како вистински авангарден проект, албумот бара целосно препуштање и внимание. Секој што ќе го доживее на овој начин, знае дека со „Loveless“, „My Bloody Valentine“ создадоа дело кое секогаш останува свежо, непредвидливо и инспиративно.
Јане Алтипармаков
