Здружението „Икуалити“, во рамки на проектот „Зен 2.0 Караван – Млади лидери на заедниците“, го одржа последниот петти Менторски форум во Струмица.
На форумот кој се одржа на 14 февруари во просториите на Здружението „Новус“, учествува 11 лица на возраст од 16 до 24 години во склоп на три менторски обуки.
„Обуките се однесуваа на три теми, обуката за јавен настап и креативно изразување, со цел унапредување на индивидуалните комуникациски вештини, обуката за индивидуално и групно застапување, со цел претставување пред различни институции и тела во рамки на правниот поредок во земјата, но и на меѓународно ниво и третата обука посветена на техники и методи за одржување на стабилен имунитет на физичко и психичко ниво“, соопштуваат од „Икуалити“.
Од таму објаснуваат дека младите во периодот од 2 месеци ќе делуваат како неформална група, која ќе има за задача преку стекнатите вештини и искуства да создадат позитивни општествени промени.
Фото: Илуалити
Дополнително, самите тие ќе предложат и изберат еден суштествен и значаен проблем од интерес за младите, но и за сите граѓани од општината и со поддршка на менторите ќе заземат активна улога и иницираат решенија за тој проблем.
„По успешните форуми во Општина Аеродром, Гостивар, Битола, Куманово и Струмица, Зен 2.0 Караванот продолжува да ги поттикнува младите и преку нивно активно делување и иницирање промени да ги поврзе со локалните власти и надлежните институции за одбраниот проблем, со цел постигнување промена која е иницирана и остварена благодарение на нивните заложби“, велат од здружението.
Воедно, посочуваат дека иницираните промени на младите лидери од 5 општини, кои веќе се во процес на имплементирање во Скопје, Гостивар, Битола, Куманово и наскоро во Струмица, ќе бидат објавени на посебен настан во текот месец март 2025 година.
