Галеријата „Пионери“ ја најавува самостојната изложба на Индиа Мулен која ќе се одржи на 20 март, со почеток во 19 часот.
Мулен е мултидисциплинарна уметница од Ирска, а изминатава деценија таа работи во театар, телевизија и филм, појавувајќи се како актерка во низа проекти признати од критиката.
„На јавноста ѝ е особено позната по улогата во прочуената ТВ-серија ‘Нормални луѓе’. Во последниве години Мулен се занимава и со филмска продукција и визуелна уметност. Нејзините фотографии се објавувани во ‘Wonderland’, ‘W Magazine’, ‘NME’ и други списанија, а во моментов е во претпродукција за својот прв филм како сценаристка/режисерка“, се посочува во најавата за изложбата.
Неодамна, Мулен се претстави со свои дела во „Have A Butchers Gallery“ во источен Лондон, во рамките на изложбата „Strange Quarks“, курирана од Алегра Вентури во соработка со уметницата и дизајнерка Џоана Лордан.
„’Нормални луѓе’ е позната ТВ-серија базирана на истоимениот роман на Сали Руни. Приказната ја следи комплексната врска меѓу Мериен (Дејзи Едгар-Џонс) и Конел (Пол Мескал), двајца тинејџери од Ирска кои припаѓаат на различни општествени слоеви, преку нивните искуства во соочувањето со љубовта, класните разлики и идентитетот, од средно училиште па сè до последните
години на колеџ. Серијата ги собра сите пофалби за суптилниот пристап кон раскажувањето, интимната визуелна естетика и трогателната изведба на Едгар-Џонс и Мескал. ‘Нормални луѓе’ со ретка автентичност ги доловува комплексните чувства на младешката љубов, а деликатната обработка на темите на ранливост и блискост ја издвојува оваа серија како една од највпечатливите драми за созревањето во последниве години“, се додава во најавата за изложбата.
