Од Националниот младински совет на Македонија (НМСМ) велат дека незамисливата загуба од Кочани не е само лична трагедија, туку и страшен потсетник на реалноста која во оваа земја секојдневно се живее – реалност во која животот е несигурен, институциите не функционираат, а чувството на безнадежност станува сè подлабоко.
„Трагедијата не е еден изолиран случај. Таа е директен резултат на системскиот хаос што владее со години. Недостигот на владеење на правото, корупцијата во секоја пора на општеството, непочитувањето на законите, нефункционалните институции и игнорантниот однос кон младите создадоа држава во која трагедиите не се исклучок – тие стануваат правило“, велат од НМСМ.
НМСМ посочува дека години наназад предупредуваат дека младите во Македонија живеат во општество што не ги штити, не ги слуша и не им нуди перспектива.
„Наместо вистинска грижа, добиваме институции кои работат селективно, во интерес на поединци и елити, наместо на граѓаните. Наместо безбедност, добиваме инфраструктура што се распаѓа, јавен транспорт што е несигурен и систем што не презема одговорност. Наместо политики што ќе го подобрат животниот стандард, добиваме ветувања што никогаш не се исполнуваат. До кога ќе дозволиме животот во оваа земја да биде прашање на среќа, а не на системска заштита? Дали ќе чекаме нова трагедија за да ги добиеме одговорите на прашањата што одамна се знаат?“, прашуваат од НМСМ.
Денес, повторно се соочуваат со болка, велат тие, но оваа болка не смее да остане само тага – мора да стане акција за:
1.Одговорност и транспарентност – надлежните институции мора да ја преземат целосната одговорност за овој случај и да ги санкционираат сите одговорни, без исклучок. Доста беше со политички манипулации и селективна правда, доста беше со меѓупартиски префрлања.
2.Владеење на правото – сакаме да живееме во земја во која законите важат за сите подеднакво, а корупцијата не е норма, туку исклучок кој се казнува.
3.Системски реформи – потребни се итни и длабоки промени во институциите, бидејќи нефункционалниот систем не само што го уништува квалитетот на живот, туку директно ги загрозува и одзема животите на младите.
4.Гарантирана безбедност за сите – оваа држава мора да создаде услови во кои младите ќе бидат сигурни и безбедни на улица, во училиштата, во превозот, на работните места, во клубовите.
5.Вклучување на младите во одлучувањето – Доста беше со носење одлуки за нас, без нас! Ако не се слушне гласот на младите, ништо во оваа држава нема да се промени“, бараат од НМСМ.
Истовремено, од таму посочуваат дека не бараат празни ветувања, туку бараат дела. Бараат безбедна средина.
„Оваа држава мора да стане место каде што младите ќе сакаат да останат, а не само да заминат. Не сакаме оваа трагедија да биде само последица, туку и причина да креирираме нов систем кој се грижи за нас. Денес тагуваме, но мора да се избориме! Дозволивме системот да им го одземе животот на младите, да не дозволиме да ни го одземе и правото да чувствуваме, да искажеме револт и да бараме правда! Оние што го создадоа овој неправеден поредок, денес се обидoa да нè замолчат. Но, нема да престанеме да бараме правда и промени!“, се вели во соопштението на НМСМ.
НМСМ изразува и најдлабоко сочувство до семејствата и најблиските на младите животи што згаснаа во трагедијата во Кочани.
