Владата вечерва одржа вонредна онлајн седница и донесе четири заклучоци што се однесуваат на деновите на жалост и на погребот на настраданите во пожарот во Кочани, кој ќе се одржи утре.
Портпаролката на Владата Марија Митева посочи дека се задолжуваат државните институции, а се препорачува на локалната самоуправа и на работодавачите од приватниот сектор да ги ослободат од работа и работни обврски сите вработени на територија на Кочани.
Таа појасни дека здравствените установи, образовните установи и градинките треба да организираат вршење услуги согласно потребите.
„Се задолжува МВР да ги преземе потребните безбедносни и сообраќајни мерки. Се задолжува Министерството за здравство во соработка со Центарот за управување со кризи и Црвениот крст да обезбеди амбулантни возила. ТППЕ Кочани да ги преземе мерките и активностите согласно своите надлежности“, изјави Митева пред Владата.
Истовремено, Владата, во координација со Министерството за внатрешни работи (МВР) и во консултација со Здружението на новинари на Македонија (ЗНМ), како и со Самостојниот синдикат на новинари и медиумски работници (ССНМ) изготвија протокол за безбедност при известување од погребот на жртвите од трагичниот настан што се случи на 16 март во Кочани.
„За претставниците на медиумите кои ќе известуваат за настанот, полициските службеници ќе обезбедат посебна зона од патот на поворката, на 300 метри од влезот на капелата до градските гробишта во Кочани. Овој простор ќе биде обезбеден од припадници на МВР со цел да се гарантира ред и безбедност во означената област. На оваа зона исто така ќе важи забраната за управување со беспилотни летала (дронови)“, рече Митева.
Медиумскиот протокол, како што рече таа, има за цел да ја заштити приватноста на семејствата на жртвите, додека истовремено овозможува новинарите и снимателите безбедно да го следат настанот од соодветна дистанца.
„Имајќи ја предвид чувствителноста на оваа трагедија и универзалните етички стандарди за професионално известување, Здружението на новинари на Македонија (ЗНМ) и Самостојниот синдикат на новинари и медиумски работници (ССНМ) ги повикува сите новинари и медиуми да се придржуваат кон следниве етички принципи – почитување на личната болка и достоинството. Новинарите треба да известуваат со емпатија, без да навлегуваат во приватноста на семејствата на жртвите.
Избегнување на сензационализам – известувањето за трагични настани мора да биде ослободено од сензации, шпекулации или емотивно набиени наративи, фотографии и видеа. Објавување на проверени информации – треба да се пренесуваат потврдени факти за да се спречат дезинформации. Зачувување на баланс и непристрасност – медиумите треба да се осигураат дека нивното известување не придонесува за јавна вознемиреност“, додаде Митева.
Освен ова, портпаролката на Владата потсети дека Меѓународната федерација на новинари (ИЈФ) во своето вчерашно соопштение за трагедијата, исто така ја истакна важноста на етичкото известување.
„Глобалната повелба за етика на IFJ ја подвлекува должноста на новинарите да го почитуваат достоинството на луѓето и да ја стават точноста над брзината при пренесувањето на вестите од овој трагичен настан. Со цел да се обезбеди непречено движење и идентификација, медиумските работници треба да поседуваат со себе прес обележја и новинарски легитимации издадени од нивните матични медиумски куќи“, додаде Митева.
