Поради обилните врнежи од дожд се излеа Маркова река во Батинци, пред Драчево, каде се поплавени улици и домови.
Од вчера попладнето и вечерта на критичните точки се правеа насипи, ангажирани беа општинска и градска механизација, ЦУК, ДЗС, пожарна…
Локалните власти пронозираа дека врнежите можеби нема да прекинат во текот на ноќта, па ги известија сите надлежни инистуциии дека ситуацијата може да ескалира.
Ситуацијата се менува од час во час, а повеќе медиуми информираа дека нивото на реката е критично кај мостовите кои што ги поврзуваат локалните места со Скопје, па пристапот до населени места, како и до Студеничани, Батинци, Зелениково и останатите во тој регион е можен само преку Јурумлери.
Конкретно кај мостот пред влезот на Драчево, имаше проблем со протокот на вода, будејќи беше загушен од шутот и граѓата под мостот.
На почетокот на ноќта, градоначалникот на Студеничани, Азем Садики, рече дека состојбата се санира.
„На неколку места има излевање од речното корито. Ангажиравме две-три машини да ја санираме состојбата. Мислам дека за населението не е многу ризично за евакуација, засега има материјални штети по дворовите на домаќинствата“, рече тој.
Од терен после полноќ се јави и градоначалникот на Кисела Вода, Орце Ѓорѓиевски.
„Остануваме на терен цела вечер и помагаме на нашиот народ, во овој момент ги одзатнуваме шахтите, вршиме мобилизација на нашите ресурси за жителите да немаат катастрофални последици“, соопшти Ѓорѓиевски.
Toj претходно посочи дека она што загрижува е што сите институции не си ја завршиле работата – со акцент на Градот Скопје од кој неколку пати имале побарано да се среди речното корито, но од таму им било одговорено дека немаат предвидено средства за оваа намена.
Од Град Скопје, пак, посочија дека одводните канали и коритото на Маркова Река се во директна надлежност на општина Студеничани и Министерството за животна средина.
„Град Скопје во неколку наврати досега апелираше до општината за потребата од чистење на каналите и коритото, но апелите за жал не наидоа на резултат од одговорните“, соопштија од Градот.
Бојан Шашевски
