Државниот просветен инспекторат ја поништи одлуката со која од работа беа избркани тројцата професори на Економскиот факултет при Универзитетот „Гоце Делчев“ – Штип кои веќе петти ден штрајкуваат со глад. Со вонреден инспекциски надзор, Инспекторатот утврдил неправилности во делот на критериумите за избор на професорите во оваа високообразовна институција.
Фото: Нова
„Државниот просветен инспекторат донесе решение за повторување на постапката за избор во звања, која што треба да биде согласно Закон за високо образование, Статут и Правилник за работа на Универзитетот ,,Гоце Делчев” – Штип“, стои во соопштението од инспекцијата.
Во однос на денешната одлука на Држвниот просветен инспекторат, професорите велат дека прво ќе го почекаат решението и записникот од постапувањето од Инспекторатот, а дури потоа официјално ќе се произнесат и ќе видат што понатаму.
„Продолжуваме со штрајкот до исполнување на нашите барања – најдоцна до втори август да бидеме избрани во повисоко наставно научно звање вонредни професоти согласно позитивните рецезентски извештаи . Не бараме ништо повеќе туку само законски да се постапи и да се испочитува законот за високо образованние“, вели за Радио МОФ, професорот Крсте Шајноски.
Иако тројцата доктори на науки, Крсте Шајноски, Маргарита Матлиеска и Александар Костадиновски веќе петти ден штрајкуваат со глад, досега ги нема посетено никој од надлежните органи. Поддршка во меѓувреме добија од Самостојниот синдикат за образование, наука и култура на Република Македонија – СОНК, од голем дел од акаденската јавност, како и од своите студенти.