Ако поминете 161 километар од главниот град, во насока на источниот дел од нашата мала, но чудесна Македонија, ќе дојдете до градот кој многумина го нарекуваат мала Швајцарија – Берово. Градот под падините на Малешевските планини со надморска височина од 800 метри, е место за одмор, релаксација и уживање.
Кога сакате да се надишете на чист воздух, да ги одморите своите умови во зеленило, да ја почуствувате најголемата гостопримливост од страна на жителите, вие дефинитивно треба да се упатите во Берово. Таму ќе го пробате највкусното беровско сирење, највкусниот свежо испечен леб од фурна, беровскиот компир, и сите други надалеку познати традиционални беровски јадења.
„Ова е совршеното место за да ги вкусите најдобрите јадења и да се одморите“ ни раскажува Кирил Бугариновски, постар жител од Берово.
Штом се упатите кон центарот на Берово пак, ќе наидете на полупразна „чаршија“ како што ја нарекуваат беровци, меѓутоа ќе ја почуствувате блискоста меѓу луѓето, гостопримливоста, но ќе го забележите шарањето на очите на тамошните жители кои ве препознаваат како странец.
Седнавме во кафулето од левата страна на чаршијата. Девојче околу 25 години, дојде и најкултурно не послужи. Ја прашав како оди работата има ли луѓе, а таа со насмевка на лицето ми одговори дека за тие работи би требало да поразговараме со сопственикот на кафичот.
Средовечен човек околу 50 години, се упати кон нашата маса и културно се претстави дека тој е всушност сопственикот и можеме да го прашаме за се што не интересира.
„Моите објекти се наоѓаат во центарот, во срцето на Берово и можам да кажам дека значително е намален бројот на туристи во однос на минатите години. Порано доаѓаа луѓе од цел свет додека сега повеќето се од нашите соседни земји. Тоа се должи на економската криза во светот, но сепак има нешто и во нашата инфраструктура. „Клепало“ е премин кон соседна Бугарија кој веќе со години се чека да почне со работа, со чие отворање би имало повеќе туристи“, ни открива Венко Зелнички ,сопственик на кафулето, кој се занимава и со мини хотелиерство.
Ако се упатите кон Беровското езеро по патот ќе ги забележите убавините на нашата земја. Беровското езеро се наоѓа на 7км од градот кои изобилува со убавини. Можеби и не го погодивме најубавиот ден со оглед на облачноста меѓутоа сепак убавината е таа која се препознава и на сонце и на дожд.
„Во зима е уште поубаво, прекриено со дебела обвивка од снег, дојдете тогаш ако сте љубители на снегот“ ни кажа Венчо Самарџиски еден од луѓето што ги продаваше, па чинам најслатките домашни сокови, компоти и многу други работи.
Се упативме кон туристичкиот центар „Аурора“ што е приказна сама по себе. Уредените паркови, игралиштата, базените, ресторанот, летната тераса, прекрасно уредените соби за престој , а сето тоа надополнето со недопрената природа, може да се нарече мал рај на земјата.
Во разговор со тамошните вработени дознавме дека најголем интерес има за време на викенд и дека туристите се претежно странци, но тоа не значи и дека македонските граѓани не доаѓаат овде.
„Оваа година имаме голема посетеност од соседна Бугарија, Холандија и Германија, па и доста наши Македонци “ – Александра Аврамска, вработена во комплексот.
Ова се само дел од убавините кои ги крие Берово кои повеќе од јасно е дека не можат да се опишат во само еден текст. За останатото, ќе треба сами да се упатите кон „Мала Швајцарија“ и да се уверите во богатствата на оваа земја кои се уште не сме ги истражиле.
Ирена Чаушки