„До каде е пречистителната станица за отпадни води“ е протестна уметничко-скулптурална акција која денеска беше поставена во реката Вардар. Акцијата е на Центарот за современи уметности и претставува повик кон властите за конечно почнување со изградба на пречистителна станица во Вардар.
„Пречистителна станица е ургентна потреба. Вардар гледаме дека е син, меѓутоа тој е петта категорија загаден. Практично, сѐ почесто станува мртва река заради загадувањето, кое дел е од индустриски капацитети, меѓутоа дел е и од фекалната канализација“, изјави Никола Писарев од Центарот.
Тој потсети дека уште во 2010 година се зборуваше дека ќе се почне изградбата на пречистителната станица, но тоа сѐ уште не се случило.
„Во меѓувреме, реката сѐ повеќе изумира. Живиот свет сѐ повеќе страда, а граѓаните на Скопје не можат да ја користат. Многу често има и смрдеа, многу често се видливи фекалиите, особено последните неколку дена кај градската канализација под Лисиче. Смредата е неподнослива, бојата на реката е неподнослива и затоа ја направивме оваа скулптурна инсталација за да потсетиме и да го кренеме гласот конечно да почне изградбата на пречистителната станица, затоа што се соочуваме со климатски промени, се соочуваме со недостиг на вода за пиење. Имаме убава река, имаме симбол на градот кој што буквално е неупотреблив“, додаде Писарев.
Како што посочи, ако пред 30 години имало 50 риболовци кои пловеле, денес нема ниту еден.
„Сметаме дека пречистителната станица е една од ургентните работи не само во Скопје, туку и во Тетово, Гостивар, Велес и другите градови за да имаме чиста река и да имаме чист резерворар на вода. Иако многупати беше ветувано дека пречистителната станица за Скопје би можела да биде готова во периодот помеѓу 2026-2028, па и порано, сведоци сме дека тоа нема шанса да се случи поради негрижата на градот за сопствената река. Токму негрижата за нашата најголема и најзначајна река која сѐ повеќе станува мртва река е директна инспирација за оваа акција“, посочи Писарев.
Неколку денови пред акцијата, актерот и фото уметник Марко Џамбазоски објави алармантно видео како фекалии директно се влеваат во Вардар.
Тој кон видеото напиша: „Целата скопска канализација, непрочистена, директно во река. Еден од ретките европски градови кој во 21 век сè уште нема пречистителна станица, ама битно десетици години ја ветуваат“.
