Американскиот џез фјужн и блуз гитарист, Скот Хендерсон, најпознат по неговата работа во бендот „Tribal Tech“, на мапата од неговата голема европска турнеја го впиша и Скопје. Хендерсон во среда (7 март) со почеток во 21 часот во организација на „3Гонга“ ќе гостува во ноќниот клуб Станица 26.
„Покрај тоа што е музичар и композитор од светска класа, заштитен знак на Хендерсон е неговиот прекрасен звук и впечатлива виртуозоност да си „поигрува“ со својата гитара и да ги компилира звуците на блуз, рок, фанк и џез“, стои во соопштението за концертот.
Инаку, роден во 1954 година на Флорида, Хендерсон пораснал на место, каде блузот и рокот не биле во својот зенит. Во младоста настапувал низ Јужна Флорида, каде свирел различен тим музика во тамошните клубови, од Лед Зепелин до Џејмс Браун. Огромно влијание на него имале музичари како Џими Пејџ, Џеф Бек, Џими Хендрикс и големите блуз гитаристи Алберт Кинг и Бади Гаи.
Хендерсон, тврди дека е повеќе блуз – рок музичар, влијанието на џезот низ неговата музичка кариера, го изгради неговиот музички стил во она што е денес.
Во 1984 година Хендерсон го формира бендот „Tribal Tech“ со басистот Гери Вилис и по девет успешни албуми, Скот конечно успеа да се профилира себеси како еден од најдобрите светски изведувачи и композитори.
Во 1991 година престижното музичко списание „Guitar World“ го именуваше како гитарист број 1 во светот. Неговиот прв соло албум „Dog party“ музички се враќа кон корените на блузот и во 1994 година е прогласен за најдобар блуз албум во музичкото списание „Guitar Player“. Неговиот втор блуз албум го поврзува со светски позната и легендарна вокалистка Телма Хјустон.
„Можеби она што најмногу восхитува кај овој великан е што денес тој предава на надоаѓачките генерации музичари на Музичкиот институт во Холивуд и честопати пишува во познатите свтски музички магазини, а има напишано и книги, меѓу кои ‘Џез-гитарски акорд систем’, револуционерна ‘лектира’ за да можат студентите да ги проучуваат плуралите на џез хармонијата“, се вели во соопштението за настанот.