Андреа Угриноска: Младите во Велика Британија се активно вклучени во справувањето со пандемијата

Го паметам крајот на февруари во Лондон по тоа што конечно сите успеавме да здивнеме од непрестајни дискусии околу Брегзит. Ете, конечно, си помислив, мирен период по бурата, да се среди малку државата. Наместо тоа, Велика Британија влезе од една во друга криза инстантно и драстично. Толку драстично, што никој не ни зборува за Брегзит повеќе. Целата држава ги остави несогласувањата на страна со цел обединување во најголемата криза по Втората светска војна.

Една од најстарите демократии во светот не го потценува гласот на младите во процесот на носење одлуки и политики. Младите во Велика Британија имаат свој Младински парламент кој секоја година има завршна дебата во Вестминстер, каде и парламентот на Велика Британија има редовни седници, и каде парламентарците и целата држава имаат шанса да ја следат во живо. Младинската седница се одржува за време на отворени денови на собранието што дополнително укажува на отвореноста на Вестминстер за слушање на гласот на младите во дебати кои ги засегаат.

Иако Македонија е можеби далеку од креирање на свое Младинско собрание, на неколку наврати успеавме да одржиме внатрешни собранија и настани во официјалната зграда на Македонското Собрание со Националниот Младински Совет на Македонија. Ваквата практика треба да се продолжи бидејќи тоа укажува на отвореноста на Собранието како зграда но и како процес кој се стреми да е блиску до граѓаните.

Во последниве неколку години еден вид на соработки помеѓу млади и носители на одлуки е доста популарен во Велика Британија – а тоа е основањето младински форуми со различни институции, како мини-дијалози каде младинскиот глас може да биде чуен и земен в предвид при носење на одлуки. Па така постои младински форум со Националниот здравствен систем, каде мислењето на младите е земено в предвид при креирање здравствени политики, и преку оваа соработка младите подигаат свест за феноменот на менталното здравје. Сличен форум постои со Народната банка на Велика Британија, каде младите имаат шанса да дадат придонес за тоа каде е иднината на парите како концепт, и да обелоденат предизвици кои тие ги имаат со менаџирање на своите пари. И конечно, ваквата сорабтка е исто и регионална, каде што постои форум за соработка помеѓу младите од Република Ирска и Велика Британија – слично на нашата Регионална канцеларија за соработка на младите од регионот – РИКО.

Моменталната ситуација за младите во Обединетото Кралство не е многу различна од аспект на можности за учевство и платформи за споделување на мислење и влијание на тематики кои ги интересираат. Исто така има огромна креативност и иницијативи кон наоѓање нови начини на работа со млади луѓе, но и огромна доза на реалност каде што сите се веќе малтене соочени со фактот дека ситуацијата може да остане ваква во Велика Британија до крајот на 2020та година. Препознатливо за Британците е оној став на оптимизам и намалена смисла на итност со цел нормализирање на новонастанатата ситуација и изнаоѓање нови модалитети како животот би продолжил.

Младите во Велика Британија работат доста активно на менталното здравје, и тоа преку соработката со националниот здравствен систем. Уште на почетокот на пандемијата, младите спонтано се вклучија во една така наречена „Виножито капања“, каде што сите прозорци беа излепени од внатре со нацртани виножита кои се заблагодаруваа на сите здравствени работници.

Дополнително, младите се моментално во преговори за започнување кампања каде што ќе подигаат свест за некои од проблемите со кои се соочуваат за време на пандемијата, посебно околу личната хигиена и металното здравје, кои ќе бидат проследени директно преку каналите за комуникација на националното здравство.

Многу брзо по донесената одлука за карантин во Велика Британија, Националниот здравствен систем креираше координирана платформа за млади волонтери кои се во состојба да помогнат како доставувачи, како возачи, за набавување на намирници на постарите и оние кои не се во состојба, како и само за разговор по телефон со оние кои чувствуваат анксиозност заради неизвесноста на ситуацијата. Јас се пријавив за некои од активностите и на неколку наврати нѐ повикаа да разговараме со постари луѓе кои беа осамени и исплашени од целата ситуација. Ова е супер можност за солидарност и алтруизам и користење на ресурси во општеството со цел поддршка на оние на кои највеќе им треба.

Моментално Британскиот младински совет води иницијатива која бара од премиерот Борис Џонсон да одржи конференција за деца и млади луѓе каде специфично ќе одговара на нивни прашања и проблематики, слично на онаа што беше одржана во Финска и Норвешка.

Младинските работници веднаш по настанувањето на пандемијата оформија заедничка алијанса чија цел е нудење помош на владата со давање информации за како младите се погодени од кризата и идеи за подобрување на истата.

Лондон секогаш патеше од слаби меѓусоседски односи заради неговата големина, брзина и населеност. За време на пандемијата со рестриктивното движење, многу невладини го искористија овој момент да промовираат кампањи кои ќе ги подобрат соседските односи и ќе креираат култура која ќе стимулира добри соседски односи и по карантинот.

Секоја држава се справува различно со пандемијата и понекогаш мерките се производ на културниот статус кво во државата. Она што е за пофалба во Велика Британија е оптимизмот и поддршката понудена на младите за справување со кризата, како и заеднички насочената енергија кон нудење на конструктуивна помош и поддршка онаму каде што е најмногу потребна.

Од Лондон за Радио МОФ пишува Андреа Угриноска, заседавач на Комитетот на млади при Советот на Европа