Градскиот совет на Барселона го инсталираше првиот фотоволтаичен тротоар во Шпанија како дел од обидот на градот да се декарбонизира до 2050 година, пишува Гардијан.
50 метри квадратни сончеви панели кои не се лизгаат, инсталирани во мал парк во областа Глорис во градот, ќе генерираат 7.560 киловатчасови годишно, што е доволно за да се снабдат три домаќинства.
Градот вложи 30.000 евра за трошоците, а остатокот го дополни производителот. Нивната одржливост ќе се процени по шест месеци.
Сепак, поради големата густина на население во Барселона, ќе биде тешко да се произведе доволно електрична енергија во границите на градот за да стане самодоволен.
Проектот во Барселона следува по поставувањето на 25-метарска лента од соларен циклус во холандскиот град Утрехт минатата година. Генерираната електрична енергија се користи за напојување на осветлувањето и исто така ја загрева патеката во зима за да се спречи нејзиното замрзнување.
Поголемиот дел од сончевата енергија на Шпанија доаѓа од големи централни во оддалечени области каде има земјоделско земјиште и шума, честопати со негативно влијание врз животната средина, но кои се далеку од центрите на население. Овој потег сега е со цел да се зголеми капацитетот близу до местото каде што е најпотребно, во градовите.
Крајната цел е во наредните пет години да се генерира доволно електрична енергија за 7,5 милиони луѓе, да се создадат над 15 000 работни места и да се намалат емисиите на СО2 за 4,2 милиони тони.
Со ова, шпанските власти се надеваат дека ќе ја намалат цената на електричната енергија и ќе им помогне на граѓаните да станат независни од неколкуте енергетски компании кои доминираат во индустријата.
Шпанија сега е рангирана на 11-тото место во светот за соларна енергија и осмо за обновливи извори на енергија во целина.
Во меѓувреме, владата објави дека планира да инвестира 1,5 милијарди евра од фондовите на ЕУ за опоравување од ковид кризата, во производство на „зелен“ водород, со употреба на обновлива енергија за разбивање на молекулите на водата и ослободување на водородот. Енергетските компании во Шпанија соопштија дека ќе го зголемат ова на 8,3 милијарди евра до 2030 година.
