Македонското трио „My Tear“ го претстави синглот „Истото го сакаш”, а со тоа го најави својот втор студиски албум, кој ќе се појави на дигиталните платформи на 18 септември.
Албумот „Кога не се сакаме“ е снимен во Студио 1060 во Скопје во текот на последните две години, а како заедничко издание ќе го објават „Corpus Delicti“ од Македонија, „JaJaJa Records“ од САД и „Pop Depresija“ од Србија.
„Некои нешта не се менуваат кога е во прашање музиката на ‘My Tear’: луда мелодија, моќна ритам секција, среќно-тажни текстови, џингл-џангл гитари… Атмосферата во песните како да оддава почит на Bob Mould од Sugar фазата, со силна Њу вејв основа и ароматични македонски зачини кои ја прават секоја песна и танцувачки гитарски хит и ода на малите животни победи. Песната ‘Истото го сакаш’ е типичен пример за песна на ‘My Tear’, со додатокот на органата што ја отсвире Деан Шкартов – Деко од култната скопска група ‘Бадмингтонс’, која спонтано ја води песната на патување по западниот американски брег“, соопштува издавачот „Pop Depresija“.
Инаку, во 2019 година, „My Tear“ го објави истоимениот деби-албум и тргна на една нова авантура, дури и за докажани андерграунд ветерани како што се Дени Крстев (вокал и гитара), Кристијан Лафазановски (тапани) и Ненад Трифуновски (бас).
Од тој албум се двојат сингловите „Остави ме да бидам“, „Лаги шарени“, „Човек од стакло“, а како хит песна се издвои и „Крај на јули“ заедно со Васко Атанасоски.
Кон крајот на летото 2023 бендот ја објави песната „На старите станици“ и најави работа на нов албум. Година дена подоцна излегува вториот сингл, „Истото го сакаш“, како предигра за албумот „Кога не се сакаме“, кој ќе биде достапен од 18 септември како дигитално издание, а до крајот на есента и на винил.
