Три дена откако Бенкси на својот Инстаграм профил го претстави својот најнов мурал нацртан врз бомбардирана зграда во градот Бородјанка, Украина, анонимниот уличен уметник потврди дека до сега нацртал седум мурали во Украина, пренесува „Си-Ен-Ен“.
Бенкси ја потврди веста откако се раширија шпекулации дека негови дела се распространети во ослободениот украински град, кој се наоѓа северозападно од Киев.
Првиот мурал, кој беше потврден минатиот викенд, претставува гимнастичарка која се обидува да најде баланс врз шутот од урнатата зграда, уништена од руските бомбардирања, а Бенкси објави три слики од муралот.
На вториот мурал е претставено младо момче кое носи униформа за боречки вештини и превртува на земја постар маж. Останатите мурали претставуваат две деца кои користат метална стапица за резервоар како клацкалка, како и жена која носи виклери и гас маска, а користи апарат за гасење на пожар.
„Ова е навистина историски момент за нашата земја. Луѓе како Бенкси и други познати личности доаѓаат тука и му покажуваат на светот што ни направи Русија“, изјавил киевски жител.
Украинскиот град Бородјанка беше силно погоден од руските бомбардирања на почетокот на руската инвазија, а голем дел од зградите сега се разрушени. Пред војната во градот биле регистрирани 13.000 жители, но повеќето сега се евакуирани.
