По гостувањето во Велес, дебатерите од дебатниот клуб на Младински образовен форум од Тетово ги посетија и своите колеги – дебатерите од дебатниот клуб во Кичево.По заедничките вежби за запознавање, тие беа поделени во две групи и дебатираа на тезата „Неформалното образование да биде задолжително, по формалното образование“.
Средношколците истакнаа дека имаат навистина потреба да учествуваат во активности надвор од училиштето, бидејќи преку нив ги зајакнуваат вештините и се усовршуваат. Тие напоменаа дека преку дебатниот клуб во нивните градови како дел од неформалното образование ги прошируваат своите гледишта, знаења, стекнуваат нови пријателства и другарства. Поголем дел од дебатерите заклучија дека неформалното образование е многу поважно од формалното образование и не сакаат да се формализира.
Главни заклучоци од дебатата беа дека неформалното образование е многу поважно од формалното и секој средношколец кој е вклучен во тој процес постигнува подобри резултати на сите полиња. Дел од дебатерите истакнаа дека не секој средношколец е заинтересиран да се вклучи во неформалното образование, а на тоа влијаат нивните родители, професори кои немаат доволно информации за придобивките од неформалното образование и ги насочуваат средношколците само кон формалното образование.
Дебатерите од двата града имаа можност за дружба и заедничка прошетка во Кичево.
Бобан Костадиновски