Поради „бранењето“ на непрописно паркираното „порше“ управувано од Срѓан Керим, за двајца припадници на обезбедувањето на претседателката Гордана Силјановска Давкова е отворена дисциплинска постапка во МВР.
За седум дена ова е втор инцидент со припадници на 6-тата Управа односно Одделот за обезбедување на објекти и лица, во кои беа вклучени двајца припадници на обезбедување на претседателот и еден припадник на обезбедувањето на премиерот (притворен поради сомнежи дека продавал строго доверливи информации од полициски истраги).
Обезбедувањето на Силјановска излегло од ресторан во Дебар Маало кога полицаец со пајак служба дошол на интервенција за да крене непрописно паркирано возило-марка „порше“.
Обезбедувачите на Силјановска тврделе дека поршето е службено и полициско, но по проверката на регистрацијата, полицаецот од придружбата на пајакот утврдил дека неговите колеги го лажат и дека сопственик на возилото е во сопственост на М.Т. (48) од Скопје. Прекршокот со приватното возило го направил 76-годишниот Срѓан Керим кој бил во ресторанот. „Поршето“ е земено и однесено со пајак возило во депо.
Полицајците од обезбедувањето на Силјановска ја продолжиле својата нелегална постапка и со службено „форд мондео“ се упатиле кон депото. Утврдено е дека полицајците се од 6-та Управа, распоредени во обезбедувањето на претседателката.
Внатрешната контрола извршила службен разговор со двајцата полицајци, при што е констатирано дека сториле потешко прекршување на работниот ред и дисциплина поради што ќе биде поднесен предлог за утврдување на дисциплинска одговорност.
Во синоќешното соопштение МВР не открива што се случило со „поршето“ и дали полицајците или „пајак“ возилото го пренеле до домот на прекршителот на сообраќајните прописи.
Во соопштението на МВР не е наведено ниту што барале припадниците на 6-тата Управа во ресторан, кого обезбедувале во ресторанот и зошто реагирале со лаги за да го спасат непрописно паркираното „Порше“ за што казнен налог доби поранешниот министер и амбасадор Керим, наместо да го почитуваат законот и правилникот за полициското работење.
Случајот го пријавил граѓанин, а во непосредна близина на рестораните во Дебар Маало, група граѓани со мобилен телефон го снимија целиот настан по што снимката беше вирално пренесена на социјалните мрежи и предизвика и акција и соопштение на полицијата. На снимката се гледаше како граѓаните гласно бараат од униформиран полицаец, кој постапува со специјално возило „пајак“, да го подигне возилото „порше каен“ со скопски регистарски ознаки, бидејќи беше паркирано на велосипедска патека.
