Сојузот на средношколци информира дека Министерството за образование и наука (МОН) и Државниот испитен центар (ДИЦ) го прифатиле нивното барање државната матура да се полага во поголемите училишни простории, како холови и фискултурни сали. Ако не ги исполнуваат просторните услови од Правилникот за државна матура – од типот на 1,5 метар распојание пред и зад ученик и од страна – во тој случај државната матура ќе се организира на факултетите.
„Согласно одлука, матурантите ќе полагаат во своите училишта, под услов тие да ги исполнуваат потребните стандарди. За училиштата кои не ги исполнуваа условите, Државниот испитен центар (ДИЦ) ќе овозможи алтернативни простории врз основа на доставени барања од засегнатите училишта“, соопштија од Сојуз на средношколци.
Претседателот на Сојузот, Берин Мухамед денеска пред новинарите посочи дека можноста за учениците да бидат тестирани во нивните школи доаѓа откако седнале да разговараат со надлежните институции.
„По реакците (на средношколците), вака ја решивме целата ситуација, со цел да бидат исполнети желбите од учениците, а истовремено добро да бидат информирани околу целата државна матура“, посочи тој.
Директорката на ДИЦ, Даниела Јовчевска-Михајловска рече дека директорите, односно од матурските одбори побарале да ги анализираат просторните услови и да достават до ДИЦ барање доколку не можат да го испочитуваат Правилникот.
„Такви училишта се повеќе во државата, така што имаме училишта од Штип, Скопје, Прилеп, Битола, Тетово… кои немаат услови да полагаат во нивните училишта. За нив ќе има организирана матура на факултетите“, рече таа.
Јовчевска-Михајловска се наврати на минатата година, потсетувајќи дека скопското „Марија Кири“, заедно со некои помали училишта, полагале на Земјоделски факултет.
„Затоа што малите училишта кои имаат бројка под 30 ученици, се поместуваат и одат да полагаат заедно со други училишта. Останатите пак, одеа по спортски сали, други школи, па носеа клупи, столчиња од своите училишта, ги пренесува, се снаоѓаа за транспорт… Сето тоа покажува дека условите не се баш најдобри. Е, сега, кога ќе отидат на факултетите, сето тоа им е наместено, само да влезат и да отпочнат со работа“, нагласи таа, дополнувајќи дека оваа година ДИЦ нема договорено блокатори, но во иднина не се исклучува такво нешто.
Берин Мухамед објасни дека веќе почна месецот април, па учениците пред професорите ќе треба да ја бранат проектната задача која, заедно со екстерните и интерните испити, е дел од државната матура.
ДИЦ веќе ги почнал подготовките за завршниот испит – објавени се тестови од минатите години заедно со точни одговори што им помага на матурантите како подготвителен материјал.
„Со тоа што ги имаат професорите блиску за плус прашања, тоа е веќе плус за учениците“, констатираше Мухамед.
Бојан Шашевски
