По повод Светскиот ден за борба против ракот, Здружението за еманципација, солидарност и еднаквост на жените (ЕСЕ) ја повикува Владата и Министерството за здравство итно да ја зголемат поддршката за превентивни програми за рана детекција и спречување на малигни заболувања.
Анализите, како што велат од здружението, покажуваат дека превентивната здравствена заштита во земјата не е приоритет.
„Буџетските средства за превенција се намалуваат, при што во 2024 година изнесуваа само 590 милиони денари, додека за 2025 година се предвидени 651 милион денари. Сепак, загрижувачки е што во последните години, со ребаланси, овие средства често се кратат. Особено алармантна е состојбата со скринингот на ракот на грлото на матката, кој иако е воведен од 2012 година, не овозможува соодветна превенција. За успешен скрининг е потребно да бидат опфатени најмалку 75 проценти од жените, но во 2023 година биле тестирани само 11 проценти од целната група. Недоволната распределба на финансиски средства (само 11 милиони денари годишно), недостигот на гинеколози во 40 општини, како и проблемите со електронското пријавување, ја загрозуваат ефективноста на програмата“, велат од ЕСЕ.
Поради тоа, дополнуваат тие, секоја година од рак на грло на матка заболуваат околу 200 жени, а во изминатите години, секоја година умираат помеѓу 40 до 60 жени од рак на грло на матка.
Според здружението, сите овие смртни случаи можат да се спречат доколку има добро организиран и соодветно финансиран скрининг на рак на грлото на матката, како и соодветен опфат со ХПВ вакцинација на младите.
„ЕСЕ бара итно зголемување на средствата за скрининг на рак на грлото на матката на минимум 35 милиони денари годишно, подобра достапност до гинеколошки услуги, зголемена вакцинација со ХПВ вакцина и спроведување на сеопфатни здравствени едукативни кампањи. Превенцијата спасува животи! Борбата против ракот мора да биде врвен приоритет за здравствените политики во земјата“, додаваат од ЕСЕ.
