Со здравици и засилени безбедносни мерки, светот ја дочека Новата година. Спектакуларни огномети беа откажани во Брисел и Париз каде се уште е живо сеќавањето на терористичките напади од ноември. И покрај тоа, јавниот дочек беше организиран на париски булевари и Елисејските полиња.
Во Брисел на полноќ можеа да се видат само приватни огномети, додека во Минхен неколку минути пред полноќ полицијата евакуираше две железнички станици и објави дека постои сериозна и непосредна закана од терористички напад.
И во Белин имаше засилено присуство на полицијата во близина на Брандербуршката капија каде стотици илјади луѓе ја дочекаа Новата година.
Силен пожар синоќа го зафати хотелот „Адрес“ во центарот на Дубаи. Поради несреќата беа евакуирани сите гости и вработени. Пожарот се проширил на неколку облакодери во околината на 63-катниот хотел, при што шестнаесет лица се повредени, најголемиот дел во турканици додека се обидувале да избегаат. Пожарот е изгаснат, но причините за пожарот се уште не се познати.
Точно на полноќ небото во Сиднеј го осветли традиционален огномет од пристаништето. Тоа беше првата светска метропола која ја дочека Новата година. Таму повеќе од милион луѓе присуствуваа на прославата, а ширум Австралија локалните власти дополнително побараа обезбедување од илјадници полицајци за патролирање низ градовите.
Прославата на новата година во Кина беше организирана во Пекинг со претстави и огномет, а телевизијата директно пренесуваше гала концерт од Националниот стадион. Шангај сепак, поради безбедност го затвори познатото шеталиште Бунд каде лани за нова година во стампедо загинаа 36 луѓе.
Во Бангкок десетици илјади луѓе ја дочекаа Новата година во центарот на градот додека тајландските власти распоредија околу 5.000 полицајци. Во Појасот Газа исламистички Хамас забрани новогодишна прослава како западен обичај спротивен на Исламот. Рестораните и хотелите организираа собири ден претходно или допрва ќе приредат прослава.
