Фотографија од мечка што спие на „Леден кревет“ победи на изборот фотографии од дивиот свет

Волшебната фотографија на Нима Сарихани од поларна мечка што спие ја доби наградата за најдобар фотограф на дивиот свет според изборот на публиката за 2023 година (Wildlife Photographer of the Year), соопшти Музејот на природна историја на Велика Британија.

Насловена „Леден кревет“, фотографијата на Нима беше избрана за шампион на натпреварот на кој гласаа рекордни 75.000 луѓе.

Сликата прикажува машка поларна мечка која лежи на мала санта мраз во близина на архипелагот Свалбард. Нима за време на својата тридневна експедиција и потрага по поларни мечки се соочил со доста предизвици, особено поради густата магла, но за среќа на крајот наишол на пар мечки – еден помлад и еден постар мажјак. Фотографијата го доловува помладиот мажјак како прави кревет на сантата мраз под полноќното сонце.

„Чест ми е што ја освоив овогодинешната награда за фотографија на годината на дивиот свет според изборот на публиката, најпрестижниот натпревар за фотографија на дивиот свет. Оваа фотографија предизвика силни емоции кај многумина што ја виделе. Иако климатските промени се најголемиот предизвик со кој се соочуваме, се надевам дека оваа фотографија инспирира надеж. Сè уште има време да се поправи нередот што го направивме’’, порача наградениот фотограф Нима Сарихани.

Победничката фотографија на Нима е меѓу речиси 50.000 пријавени од 95 земји на натпреварот.

„Воодушевувачката и потресна слика на Нима ни овозможува да ја видиме убавината и кревкоста на нашата планета. Неговата слика која предизвикува размислување е остар потсетник за интегралната врска помеѓу животното и неговото живеалиште и служи
како визуелна претстава за штетните влијанија од затоплувањето на климата и губењето на живеалиштата’’, вели директорот на Музејот на природна историја, Д-р Даглас Гур.

Инаку, островите Свалбард се меѓу најизолираните во светот и се наоѓаат високо во Арктичкиот Океан. Тие се дом на една од 19-те светски популации на поларни мечки. Се смета дека популацијата на Баренцовото Море има околу 3.000 мечки.

Изложбата, со победничката слика на Нима и четири други високопофалени фотографии, е поставена во Јужен Кенсингтон и е отворена до 30 јуни 2024 година. Во продолжение погледенете ги и другите фотографии.