Колективот „Гола планина“ ја презема „Буква“ на 31 јануари, петок, каде „голопланинци“ ќе имаат специјална џем сесија плус музичка селекција по повод четвртиот роденденот на овој скопски локал и културно свртувалиште.
„Четири години и четирицифрен број денови постои ‘Буква’ во Скопје. На истото место, зад Собрание, под трите брези, со сите повеќе или помалку трајни, но еднакво драги и свои лица. Четири години во служба само и само на културата во главниот град. Ова наше и ваше место живее како собирен пункт и канал за комуникација на она што во Македонија и пошироко, низ Европа и низ светот, го прават стотици, а со овој роденден веќе и илјадници уметници, музичари, поети, писатели, режисери… Со сиот свој простор, со сите свои полици, ѕидови и ќошиња, и со широкиот шанк на кој секогаш има уво за секоја приказна. Така како што единствено може да биде – природно, искрено и верно.
Повторно им благодариме на сите другари, другарки и верни посветеници, на сите што ‘Буква’ ја гледаат како свое место, продолжеток на дневната соба, втор дом, на сите кои доаѓаат на нашите свирки, изложби, промоции, проекции, на мирување во денските часови, за да се видат со своите драги, за да се запознаат со идни пријатели или за да помолчат сами на свое место…
Ве очекуваме на нашиот заеднички четврт роденден!“, стои во најавата за настанот.
