Завршена е првата фаза на градежните работи на новиот мега-парк во општина Карпош, зелен појас кој се простира на површина од 86.000 метри квадратни, соопштуваат од Град Скопје.
„Се уреди и исчисти запуштениот простор кој беше непристапен и обраснат, а сега прераснува во парк со чија реализација како проект и дел од програмата ‘За модерно Скопје’, се делува со цел долгорочно унапредување, заштита и зачувување на животната средина“, се вели во соопштението.
Од Градот посочуваат дека во првата фаза од паркот покрај зелениот појас, дрвјата и садниците, завршена е изградбата на пешачките патеки, а се продолжува со паркинг за посетителите, нова урбана опрема и паркови за миленици.
Исто така, тврдат дека посветено се работи на подигнување и уредување на зелени, модерни и еколошки содржини во градот кои се дел од долгорочните решенија за почиста животна средина и почист воздух за граѓаните на Скопје.
„За прв пат по децении во општина Ѓорче Петров на површина од 32.000 метри квадратни, Аеродром на површина од 27.000 метри квадратни и Чаир на површина од 30.000 метри квадратни, се подигнати нови паркови површини, а низ јавните простори во надлежност на градот дизајнирани се и нови зелени јавни површини и паркови, кои Град Скопје како простор отпочнува да ги ревитализира и зазеленува за поубав град и здрава животна средина“, стои во соопштението од Град Скопје.
Фото: Град Скопје
