Грузискиот парламент вчера на пленарна седница го отфрли ветото на претседателката Саломе Зурабишвили и го усвои таканаречениот Закон за странски агенти, пренесува Радио Слободна Европа.
Законот претходно предизвика неколкунеделни протести и критики дека е направен според репресивниот руски закон.
Како што се наведува, претседателката сега има пет дена да го усвои нацрт-законот. Доколку не го стори тоа, законот ќе го потпише претседателот на парламентот.
Европската Унија (ЕУ) објави дека „длабоко жали“ за усвојувањето на законот, а шефот на дипломатијата Жозеп Борел изјави дека ЕУ „ги разгледува сите опции за да реагира на овие настани“.
Брисел предупреди дека тоа влијае на напорите на земјата за пристапување во ЕУ.
Законот беше усвоен и покрај апелот на ЕУ и неколку нејзини членки до пратениците да не го поништуваат ветото на претседателката.
Владејачката партија Грузиски сон има удобно мнозинство во парламентот, така што гласањето за отфрлање на ветото се сметаше за обична формалност бидејќи клучната парламентарна комисија го испрати предлог-законот на пленарна седница во понеделникот.
Со законот се бара од граѓанското општество и медиумите кои добиваат повеќе од 20 отсто од своето финансирање од странски извори да подлежат на надзор што може да вклучи санкции за сè уште недефинирани кривични дела.
Често се нарекува „руски закон“ поради неговата сличност со законите што ги воведе Кремљ за да ја задуши опозицијата и слободата на говорот.
