Издавачката куќа Феникс од Скопје распишa нов литературен конкурс Конкурс за современи авторски бајки посветени на Скопје.
Оттаму истакнуваат дека ликовите, настаните, атмосферата и локалитетите треба да се поврзани со градот.
„Темите и мотивите се слободни, како и начините за стилска и изразна постапка од страна на самите автори. Обемот на авторските бајки треба да биде од 3 до 10 страници А-4 формат, а бројот на авторските бајки воопшто не е ограничен, што значи дека еден автор може да испрати повеќе свои авторски бајки“, велат од издавачката куќа.
Од „Феникс“ напоменуваат дека сите бајки треба да бидат потпишани со името и презимето на авторот, а во прилог треба да се наведе мејл, телефонски број и возраст.
Рокот за испраќање на авторските бајки е од 5 април до 5 мај 2022 година, а заинтересираните своите авторски дела треба да ги испратат на мејлот info@viart.mk
Од издавачката куќа нагласуваат дека избраните авторски бајки ќе бидат објавени во посебно издание – книга со наслов „Авторски бајки за Скопје“.
