Во среда (30.10.2019) во Музеј на Северна Македонија за првпат се отвора изложбата „Африка во Македонија“, која на едно место ќе ја прикажува поврзаноста помеѓу Македонија и Африка од предисторијата до денес.
Ќе бидат презентирани повеќе археолошки, етнолошки и уметнички експонати, како и архивски материјали што ги истакнуваат културните, историските, религиските и политичките врски помеѓу овие навидум далечни простори.
На изложбата исто така ќе бидат претставени повеќе африкански ракотворби и фотографии од личните колекции на Мирослав Масин, Роберт Смилески, Јасмина Никуљска, Петар Јовановски, Кристина Бицева, Билјана Јурукоски, Филип Кондовски и Скопскиот џез фестивал.
Автори на изложбата се доц. д-р Гоце Наумов (Музеј на Република Северна Македонија) и проф. д-р Никос Чаусидис (Универзитет „Св. Кирил и Методиј“). Таа се реализира во соработка помеѓу Музеј на Република Северна Македонија и Археолошкиот музеј на Република Северна Македонија, Завод за заштита на спомениците на културата и музеј – Охрид, Музеј на град Скопје, Завод за заштита на спомениците на културата и музеј – Битола и Национална установа Стоби.
Изложбата ќе биде отворена во 20 часот во изложбените сали на музејот.