Oд утре (1.04.2021 год) сите студенти кои ги исполнуваат условите за користење на годишен студентски билет за бесплатен јавен превоз треба да поседуваат уредно заверен/продолжен билет за 2021 година. Во спротивно, во случај на контрола, ќе им биде пишана казна, информираат од Јавното сообраќајно претпријатие – Скопје.
Во замена на билет не се признаваат индекс, потврда за студент и слично, посочуваат од претпријатието.
Денеска истекува рокот за продолжување на важноста на посочениот тип на билет.
„ЈСП Скопје заради актуелната ситуација со Ковид 19 излезе во пресрет на студентите и нивните матични факултети и овозможи речиси 5 месеци за продолжување на билетот“, велат од претпријатието.
Досега во два наврати рокот беше продолжен, наместо до 31 декември, тој се продолжи првично до 28 февруари, а потоа до 31 март.
